ር. ሊ. ጳ. ምእንቲ እቶም ግዳያት ምህማም ምድሪ ዝኾኑ ኢትዮጵያውያን ጸልዮም

ኣባ ተወልደ መብራህቱ - ሃገረ ቫቲካን

ርእሰ ሊቃነ ጳጳሳት ፍራንቸስኮ ኣብ መወዳእታ ናይ ዕለተ ሰንበት ጸሎት መልኣከ እግዚኣብሔር፣ ነቶም ግዳያት ናይቲ ኣብ ደቡባዊ ኢትዮጵያ ኣብ እትርከብ ቍሸት ዘጋጠመ ዓቢ ምህማም ምድሪ ብምዝካር ጸሎት ኣዕሪጎም ። ምስቶም ስቓይ ዝወረዶም ሰባትን ምስቶም ሓገዝ ዝህቡ ናይ ህይወት ኣድሕን ሰራሕተኛታትን ከም ዘለዎም ቅርበት ውን ገለጹ ። ብሰንኪ እቲ ኣብ ዞባ ጎፋ ደቡባዊ ኢትዮጵያ ዘጋጠመ ኽልተ ሓደጋታት ምህማም ምድሪ ቍጽሪ ዝሞቱ ሰባት 257 በጺሑ ከም ዘሎና ጌና ይውስኽን ኣሎ፣ እቶም በዚ ባህርያዊ ሓደጋ እተፈናቐሉ ሰባት ውን  ሰብኣዊ ናይ ግብረ - ሰናይ ረድኤት የድልዮም ኣሎ ። እቲ ቐዳማይ ኣብ ሓደ ኣኽራን ዝበዝሖ ኸባቢ ኬንቾ ሻንቻ ጎዝዲ ብ21ን 22 ሓምለን ብርቱዕ ዝናም ብምዝናሙን፣ እቲ ኻልኣይ ከኣ ነቶም ህይወት ሰባት ንምድሓን እተኣከቡ ዘጋጠሞም ሓደጋታት ኢዩ።

ውግእ ወትሩ ስዕረት እዩ

ርእሰ ሊቃነ ጳጳሳት ኣብ ዓለም ክንደይ ዚኣኽሉ ሰባት ብመዓት ውግእ ይሳቐዩ ኸም ዘለዉ ዘኪሮ፣  እንተዀነ ግን ኣጽዋር ምፍራይን ምሻጥን ይቕጽል ኣሎ፣ እዚ ድማ ንዓበይትን ንኣሽቱን ውግኣት ዘጐሃህርን፣ ንዓለምለኻዊ ሃብቲ ድማ ዘዕኑ ዘሎን ኢዩ በሉ ። ንደቅሰብ "ውግእ ወትሩ ስዕረት እዩ" ብምባል ውን ኣጕልሑ።

ኣቦሓጎታትን እኖሓጎታትን ኣረጋውያንን ምዝካር

ድሕርዚ ርእሰ ሊቃነ ጳጳሳት ነታ ኣብዛ ዓመት እዚኣ ብዕለት 28 ሓምለ ዓለምለኻዊ መዓልቲ ንኣቦሓጎታትን እኖሓጎታትን ኣረጋውያንን ሽማግሌታትን ተዘኪሩላ ዝዕል ዕልት ዘከሩ፣ እዛ መዓልቲ እዚኣ ኸኣ በቲ ካብ መጽሓፍ መዝሙር ዳዊት እተወስደ "ብእርጋነይ ኣይትደርብዩኒ" ዝብል ጭርሖ ዘለዋ ኢያ። ብፍላይ ኣብ ሓጋይ ጽምዋ ኸቢድ ጾር ኣብ ዚዀነሉ እዋን ንኣረጋውያን ሽማግሌታን ምጥንጣኖም ኪፍታሕ ዘለዎ ዜሕዝን ሓቂ ምዃኑ ገለጹ።

ድምጺ እቶም 'ኣይትሕደጉኒ!' ዚብሉ ኣረጋውያን ኪሰምዑን 'ኣየድፈካን እየ!' ቢሎም ክምልሱሎምን ንኹሉ ጻውዒት ኣቕረቡ።  መጻኢና ኣብቲ ኣቦሓጎታትን እኖሓጎታትን ደቂ ደቅናን ብሓባር ምንባር ዚመሃሩሉ መገዲ ስለ ዚምርኰስ ነቲ ኣብ መንጎ ደቂ ደቅናን ኣቦሓጎታትን እኖሓጎታትን ንኣሽቱ ዀኑ ዓበይቲ ዘሎ ኺዳን ኬደልድሉ ኣተባብዕዎም። ኣብ መደምደምታ ኸኣ ኵሉ ሰብ ንኣረጋውያን ወትሩ ኺዝክርዎምን ንዅሎም ኣቦሓጎታትን እኖሓጎታትን ናይ ምትብባዕ ጠቕዒት ከጣቕዑሎም ብምሕታት ምሕጽንታኦም ዛዘሙ ።