ፈተነ ቅትለት ኣብ ልዕሊ ዶናልድ ትራምፕ

ስምዖን ተ. ኣርኣያ - ሃገረ ቫቲካን

ኣብ ልዕሊ ሕጹይ ርእሰ ብሔር ሕቡራት መንግስታት ኣሜሪካ ዶናልድ ትራምፕ ኣብ ባትለር ፔንስልቨንያ ኣብ ዝተኻየደ ናይ ምረጹኒ ጎስጓስ ፖለቲካዊ መድርኽ እንከለዉ ናይ ቅትለት ፈተነ ከም ዝእተፈጸመን እቲ መጥቃዕቲ ዝፈጸመ ተባሂሉ ዝግመት ሰብ ብኡንብኡ ብኣባላት ሓለዋ ጸጥታን ድሕንነትን ከም እተቐተልን ትራምፕ ኣብ የማናይ እዝኑ ብጥይት ከም እተሃረመን ናብ ሓደ ናይቲ ከባቢ ቤት ሕክምና ከም እተወስደን ድሒሩ ድማ ናብ ኒውጀርሲ ብነፋሪት ከም እተጓዕዘ ዜና ቫቲካን ካብታ ሃገር ዝወጹ ሓበሬታ ጠቒሱ ይሕብር።

ኵላዊ ምኹናን ፖለቲካዊ ዓመጽ

እቲ ፈተነ ቅትለት ካብ ኩሉን ብኹሉን ከም እተወግዘን ኣብ ዝመጽእ ምርጫ ተቓዋሚ ትራምፕ ዝኾነ ኣብ መርሕነት ዘሎ ርእሰ ብሔር ጆ ባይደን፡ ድሕሪ’ቲ መጥቃዕቲ ምስ ትርምፕ ብስልኪ ከም እተራኸበን ድሒሩ ድማ ኣብ ኤክስ ማሕበራዊ መረብት ብዘሎ ኣድራሻኡ ኣቢሉ፥ “[ትራምፕ] ደሓን ከም ዝኾነን ስርሑ እውን የሳልጥ ከምዘሎ ምስ ሰማዕኩ ኣዝየ ተሓጒይሰ፡ ንዕኡን ንስድርኡን ከምኡ’ውን ንኹሎም ነቶም ኣብቲ ናይ ምረጹኑ ጎስጓስ ዝነበሩን እጽሊ” ዝብል መልኽቲ ከም ዝዘርገሐን ወሲኹ ድማ፡ “ኣብ ሕቡራት መንግስታት ኣመሪካ ከምዚ ዓይነት ዓመጽ ቦታ የብሉን። ከም ሓደ ህዝቢ ተጠርኒፍና ክንኩንኖ ኣለና” ከም ዝበለ ዜና ቫቲካን ምንጭታት ሓበሬታ ሕቡራት መንግስታት ኣመሪካ ጠቒሱ ይመላኽት።

ጳጳሳት ንፖለቲካዊ ዓመጽ ይኹንኑ

ድሕሪ እቲ ፈተነ ቅትለት ኣቦ መንበር ጉባኤ ካቶሊካውያን ጳጳሳት ሕቡራት መንግስታት ኣመሪካ ሊቀ ጳጳሳት ቲሞቲ ብሮልዮ ኣብ ዘውጽእዎ መግለጺ፡ “ምስ ኣሕዋተይ ጳጳሳት ብሓባር ንፖለቲካዊ ዓመጽ ንኹንን፡ ንነበር ርእሰ ብሔር ትራምፕ ድማ ጸሎትና ነቕርብ፡ ከምኡ’ውን . . . ነቶም ዝተቐትሉ ወይ ዝተጎድኡን። ንሃገርናን ንፖለቲካዊ ዘይምርድዳእን ፈጺሙ መፍትሒ ዘይኰነ ፖለቲካዊ ዓመጽ ከብቅዕ እውን ንጽሊ - ቢሎም - ሰናይ ድሌት ዘለዎም ሰባት ኵሎም ኣብ ሃገርና ሰላም ክህሉ ክጽልዩ” ዓዲሞም ኣማላድነት ቅድስተ ማርያም እመ ኣማልክ ሓላዊት ኣመሪካ ከም እተማሕጸኑ ዜና ቫቲካን ናይ ሕቡራት መንግስታት ኣመሪካ ጉባኤ ጳጳሳት ዘውጸኦ መግለጺ ጠቑሱ ይሕብር።

ቅድስቲ መንበር ስክፍታኣ ትገልጽ

ቅድስቲ መንበር ዕለት 14 ሓምለ ሰንበት ንግሆ ኣብ ዘውጽኣቶ መግለጺ፥ እቲ ዝተፈጸመ ዓመጽ ንህዝብን ደሞክራስን ዝጎድእን ናብ ስቓይን ሞትን ዘብጽሕ እዩ ቢላ ስክፍታእ ከም ዝገለጸት" ናይ ቅድስቲ መንበር ዜናን ክፍሊ ማሕተምን መግለጺ ሓቢሩ፥ እቲ መግለጺ ቀጺሉ " ቅድስቲ መንበር ኣብቲ ናይ ሕቡራት መንግስታት ኣመሪካ ጳጳሳት ንሃገሮምን ንግዳያትን ንሰላምን ሓድነት ሃገርን ዓመጽ ድማ ፈጺሙ ከይዕወት ኣብ ዘቕረብዎ ጸሎት ትሓብር” ይብል።