ሓማስ ኣብ ቓዛ ብዛዕባ ዘሎ ተስፋታት ይዛተይ

ስምዖን ተ. ኣርኣያ - ሃገረ ቫቲካን

ኣብ መወዳእታ ሰሙን ሓላፊ ኣባል ማእከላይ መርሕነት ሓማስ እስማዒል ሃኒየ ምስ ሓላፊ ስለያ ምስሪ ኣባስ ካመል ኣብ ቓዛ ተጻብኦታት ደው ንምባል ኣብ ዝሕግዝ መስርሕ ቀጻሊ ዘተ ኣብ ዝምልከት ጉዳይ ከም ዝዘተየ ዜና ቫቲካን ካብ ምስሪ ዝወጸ ሓበሬታ ጠቒሱ የመላኽት።

እቲ ብናይ ስልኪ ርክብ ዝተኻየደ ዘተ፡ ዋሽንግተን ኣብ መንጎ እስራኤልን ሓማስን ዕርቂ ዘጠቓለለ ናይ እሱራት ምልውዋጥ ስምምዕ ክህሉ ዝብል ኣብቲ ናይ ቶኽሲ ደው ንምባል ዝተሓንጸጸ ናይ ዘተ ሰነድ ክውሰኽ  ሓሳብ ድሕሪ ምቕራባ ከም ዝኾነ ካን እተሰምየ ናይ እስራኤል ረድዮ ዝሃቦ ሓበሬታ ዝጠቐሰ ዜና ቫቲካን ኣስዒቡ፥ ብመሰረት እቲ ፈነወ፡ እቲ ናይ መወዳእታ ሓሳብ፡ ኣብቲ ነበር ቤት ምኽሪ ኲናት እስራኤል ዝጸደቐን ኣብ ወርሒ ግንቦት ርእሰ ብሔር ጆ ባይደን ዝቐረበን እማመ ዝተመርኮሰ እዩ።

ተደራደርቲ ቀጠርን ምስርን ምስ ኣመሪካ ብምዃን፡ ስምምዕ ምልውዋጥ እሱራት ዝድግፉ ከም ዝኾኑን ኣብ መንጎ እስራኤልን ሓማስን ካልኣይ ዕርቂ ክገብሩ ተስፋ እውን ከም ዘለዎም ይንገር።