ማእከላይ ዝኾነ ፖለቲካ መርገጺ ዘለዎ ፔዘሽክያን ሓድሽ ርእሰ ብሔር ኢራን ኮይኑ ተመሪጹ

ስምዖን ተ. ኣርኣያ - ሃገረ ቫቲካን

ማሱድ ፔዘሽክያን – ‘ማእከላይ’ ዝኾነ ፖለቲካ መርገጺ ዘለዎ ምዃኑ ዝንገረሉ ርእሰ ብሔር ኢራን ንኽከውን ከም እተመረጸን፥ ሚኒስተር ጥዕና ነበር ፔዘሽክያን፡ ኣብ ኢራን ኣብ ዝተኻየደ ሕዝባዊ ምርጫ ተዓዋቲ ምዃኑ ንብዙሓት ወሃብቲ ርእይቶን ተንተንቲ ፖለቲካ ከም ዘገረመን ድሕሪ ምምራጹ ደገፍቱ ምሉእ ለይቲ ሓጎሶም ክግለጹ ከም እተራእዩ ዜና ቫቲካን ካብ ኢራን ዝወጸ ሓበሬታ ጠቒሱ የመላኽት።

እዚ ውጽኢት ድሕሪ’ቲ ኣብ መንጎ ፔዘሽክያንን ኣብ ጉዳይ ኑክልየሳዊ መርሓ ግብሪ ኢራን ዋና ተደራዳሪ ዝነበረ ስዒድ ጃሊሊን ኣብ ዝተኻየደ ካልኣይ ዙርያ ምርጫ ዝተረኽበ ምዃኑ ዝሓበረ ዜና ቫቲካን ኣስዒቡ፥ ፔዘሽክያን ካብ ጠቕላላ 30,573,931 ድምፂ 16,384,402 ረኺቡ - ካብ ጠቕላላ ድምጺ 49.8 ሚኢታዊ ዝሽፍን ከም ዝኾነን፡ ፔዘሽክያን 69 ዓመት ዕድመ ዘለዎን፡ ብርግጽ ኣብ ፖለቲካ ሓድሽ መጻኢ ኣይኮነን። ብሞያኡ ሓኪምን ሓኪም ናይ ስነ መጥባሕቲ ልቢ ከም ዝኾነን፡ ኣብ ሓደ እዋን ምኽትል ኣፈ - ጉባኤ ህዝባዊ ባይቶ ኢራን ኮይኑ ከም ዘገልገለን፡ ኣብ ዘካየዶ ናይ ምረጹኒ ጎስጓስ ነቲ ዕሉል ግብረ ገባዊ መምርሕታት ኢራን ክገትእን ምስ ምዕራባውያን ሓይልታት ሓድሽ ኑክሌየሳዊ ስምምዕ ክገብርን ቃል ከም ዝኣተወን እዚ ድማ ነቲ ስንኩል ዝኾነ እገዳታት ከወግድ ዘኽእል ተስፋ እውን ምዃኑ ክንገር እንከሎ እዚ ፈለማ ንዝመጽእ ዓመት ክካየድ ተሓሲቡ ዝነበረ ሕዝባዊ ምርጫ፡ ድሕሪ እቲ ዕለት 19 ግንቦት ብሓደጋ ሂሊኮፕተር ካብዚ ዓለም ብሞት ምፍላይ ርእሰ ብሔር ኢብራሂም ራይሲን ናይ ቀረባ ተሓባበርቶምን ምኽንያት ንቕድሚት ዝተሳሕበ ምዃኑ ዜና ቫቲካን የዘኻኽር።