ሕቡራት ሃገራት ኣብ ሃይቲ ብጉጅለታት ዝፍጸም ዓመጽ ኮኒኑ

ስምዖን ተ. ኣርኣያ - ሃገረ ቫቲካን

ሃይቲ ማሕበረሰብ ዓለም ነቲ ኣጋጢምዋ ዘሎ ዘስካሕክሕ ኩነታት ኣለልዩ ንምምካትን ንምቅላልን ጭቡጥ ስጉምቲ ክወስድ ዘይሕለል ጸውዒት ካብ ምቕራብ ከም ዘይቦኸረት ዝፍለጥ ኮይኑ፡ ዋና ጸሓፊ ሕቡራት ሃገራት ኣንቶንዮ ጉተረዝ ነዚ ኣቃልቦ ብምግባር ነቲ ህጹጽ ጻውዒት እታ ሃገር ርኡይ ምላሽ ብምውጣንን ብምውዳብን ከም ዝሓገዘን ኬንያ እውን ዝያዳ ልባዊ ግብረ መልሲ ብምሃብ፡ 200 ልዑል ስልጠና ዝወሰዱ ኣባላት ሓይሊ ጸጥታ ናብ ሃይቲ ከም ዝለኣኸትን እቶም ኣባላት ሓይሊ ጸጥታ ካብ ዕለት 25 ሰነ ኣትሒዞም ኣብ ሃይቲ ከም ዝርከቡ ዜና ቫቲካን የዘኻኽር።፡

ባይቶ ጸጥታ ንዓመጽ ጕጅለታት ኮኒኑ

ባይቶ ጸጥታ ወድብ ሕቡራት ሃገራት፡ ኣብ ሃይቲ ስርዓትን ሕግን ንምምላስ ዳግማይ ሰላምን ምርግጋእን ንምርካብን ገና ብዙሕ ክስራሕ ከምዘለዎ የስተውዕል። ነቲ ብናይ ጎደና ጕጅለታት ኣብ ልዕሊ እታ ሃገር ዝወርድ ዘሎ ዕንወት ዝኹንን ውሳነ ከም ዘመሓላለፈን ክሳብ ሕጂ እቶም ዕጡቓት ናይ ጎደና ጉጅለታት ንመብዛሕትኡ ከባቢ ርእሰ ከተማ ፖርት ኦ ፕሪንስ ዝቆጻጸሩ ምዃኖም ክንገር እንከሎ፡ ኣብ ሃይቲ  ፍትሓውን ነጻን ርእሰ ብሔራዊ ምርጫ ንምምችቻእ ብዝተኻእለ መጠን ንምሕጋዝ ዝዓለመ ፖለቲካዊ ተልእኾኦም ክሳብ  ዝመጽእ ዓመት ዕለት 15 ሓምለ ከም ዘናወሐን እቲ ኩነታት ቅልውላውን ዘይምርግጋእን ድሕሪ ቅትለት ርእሰ ብሔር ጁቬናል ሞይስ ዕለት 7 ሓምለ 2021 ዓ.ም. ዝተለዓዓለ ኮይኑ፡ ግዜ እናሓለፈ ምስ ከደ ድማ ዳርጋ ካብ ቁጽጽር ወጻኢ እናኾነ ነታ ሃገር ኣብ ከቢድ ስቓይ ይሽምማ ምህላዉ ዝፍለጥ ኮይኑ ሓድሽ መራሔ መንግስቲ ጋሪ ኮኒል ኣብዚ ናብቶም ኣገደስቲ ዲሞክራስያዊ ምርጫታት ዝመርሕ ዝተሓላለኸን ኣጸጋምን መሪርን መስርሕ ሓይሊ ጸጥታ ኬንያ ኣገዳሲ መስመር ህይወት ምዃኑ ንውድብ ሕቡራት ሃገራት ከም ዝሓበረ ዜና ቫቲካን ኣፍሊጡ።