ውድብ ጥዕና ዓለም ብዛዕባ ሓደጋ ፖልዮ (መልመስቲ) ኣብ ቓዛ 'ኣዝዩ ስክፍታ' ከም ዘለዎ ይገልጽ

ስምዖን ተ. ኣርኣያ - ሃገረ ቫቲካን

ኣብ ቓዛ ኣብ ረስሓ ማይ ብዝተረኽበ ኣሰር ተህዋስ መልመስቲ ሕማም (ፖሊዮ) ብሰፊሕ ክላባዕ ከም ዝኽእል ትካል ጥዕና ዓለምን ሓልዮ ህጻናት ትካል ውድብ ሕቡራት ሃገራትን ኣጠንቂቖም ኣብቲ ከባቢ ጃምላዊ ወፍሪ ክታበት ከየድለየ ኣይክተርፍን እዩ ይብሉ።

ብመሰረት ጸብጻብ ሚኒስትሪ ጥዕና እስራኤል፡ እቶም መርኣያታት ህላወ ተህዋስ መልመስቲ፡ ኣብ ቤተ - ስነ ምርምር ተህዋስ እስራኤል ኣብ ዝተገብረ መርመራዊ መጽናዕቲ ካልኣይ ዓይነት ተህዋስ መልመስቲ ከም ዘሎ ክፍለጥ እንከሎ። ውድብ ጥዕና ዓለም እውን ቅድም ክብል ተመሳሳሊ ድምዳመ ኣውጺኡ እውን እንተነበረ ክሳብ ሕጂ በዚ ሕማም ዝተጠቕዐ ኮነ ዝሞተ ሰብ ግን ከም ዘይተራእየ የረጋግጽ።

መልመስቲ ንህይወት ኣብ ሓደጋ ዘእቱ ሕማም ክኸውን ከም ዝኽልን ብቐንዱ ንዕሸላት ትሕቲ 5 ዓመት ዝዕድሚኦም ህጻናትን ዘጥቅዕ እዩ ብጀካ ህንጻናት ንዘይተኸተበ ሰብ እውን ክሕዞ ዝኽእል ሕማም ምዃኑ እዩ ዝፍለጥ።

እቲ ቫይረስ ንዓንዲ ሕቖ ዘጥቅዕ ኮይኑ፡ ኣብ ህጻናት ንድሕሪት ዘይምለስ መልመስቲ ከስዕብ ይኽእል።

ሰራዊት እስራኤል ድሮ ኣብ መሬት ፍልስጤም ንዝተዋፈሩ ወተሃደራቱ ሰፊሕ ወፍሪ ክታበት ጀሚሩ ከም ዘሎን እቲ ወፍሪ ክትባት ንኹሎም ኣባላት ኣጋር ወተሃደራት፡ ንስሩዕን ዕቑር ሰራዊትን ዝምልከት ኮይኑ፡ ካብዚ ብተወሳኺ ንህዝቢ ፍልስጤም ክትባት ክቐርብ ከም ዝኾነን ዛጊድ 300 ሽሕ ክታበት ተረኺቡ ኣሎ።

ኣብ ካልእ ቦታታት፡ ብመሰረት ሚኒስትሪ ጉዳያት ወጻኢ ቻይና፡ ኣል - ፋታሕን ሓማስን ዘለዎም ዘይምርድዳእ ኣወጊዶም ኣብ ውሽመጥ ቓዛ ግዝያዊ መንግስቲ ንምቛም ምስ ካልኦት 12 ጉጅለታት ፍልስጤም ከም እተሰማምዑ ክፍለጥ እንከሎ፡ እቲ ኣብ ቻይና እስላማዊ ሓማስ ዝርከብዎም 14 ጉጅለታት ፍልስጤም ድሕሪ ኲናት ኣብ ወሽመጥ ቓዛ ሃገራዊ ግዝያዊ መንግስቲ ክቐውም ከምዝተሰማምዑ ሚኒስተር ጉዳያት ወጻኢ ቻይና ዋንግ ዪ ከም ዝሓበረን ቻይና ኣብ ዝሓለፈ እዋን ንግርጭት እስራኤልን ፍልስጤምን ብኽልተ ጎረባብቲ ሃገራት ዝብል መገዲ ክፍታሕ ከም ዝኽእልን ነዚ መርገጺ እዚ ድማ ከም እትድግፍን እዚ ኸኣ ከም ጎረቤት እስራኤል ብሓባር እትነብር ናጻ ሃገር ፍልስጤም ክትህሉ ዝብል ምዃኑ ዜና ቫቲካን ይሕብር።