Анёл Панскі: Валадарства Хрыста – у праўдзе і міласэрнасці
Аляксандр Амяльчэня - Vatican News
У момант, калі Езуса прывялі да рымскага пракуратара для смяротнага прысуду, паміж імі адбываецца кароткі дыялог, у якім асаблівае значэнне набываюць два словы: кароль і свет.
Пілат, разважаючы як чыноўнік імперыі, пытаецца ў Езуса: "Ты Кароль юдэйскі?" Для яго кароль – гэта ўлада, якая пануе над усімі падданымі і таму ўяўляе пагрозу для імперыі. Езус пацвярджае сваё каралеўства, але зусім у іншым сэнсе. Ён – Кароль як сведка праўды, Яго каралеўская ўлада заключаецца ў праўдзівым слове, якое мае сілу перамяняць свет.
Святы Айцец падкрэсліў, што свет Понція Пілата – гэта свет, дзе пануе права мацнейшага, дзе багаты перамагае беднага, а гвалтоўны – пакорнага. Гэта той свет, які мы, на жаль, добра ведаем. Але Каралеўства Хрыста не з гэтага свету. Яго Каралеўства – новае і вечнае, якое Бог рыхтуе для ўсіх, ахвяруючы сваё жыццё дзеля нашага збаўлення.
Папа адзначыў, што Езус гаворыць з Пілатам вельмі блізка, але той застаецца далёкім, бо жыве ў іншым свеце. Пракуратар не адкрываецца на праўду, нават калі яна стаіць перад ім. Ён загадае ўкрыжаваць Езуса і напісаць на крыжы Кароль Юдэйскі, не разумеючы сапраўднага сэнсу гэтых слоў.
Францішак заклікаў вернікаў задаць сабе пытанні: "Ці магу я сказаць, што Езус – мой Кароль? Ці, можа, у маім сэрцы ёсць іншыя "каралі"? (...) Ці бачу я ў Ім міласэрны твар Бога, які заўсёды прабачае і чакае, каб даць нам прабачэнне?"
Святы Айцец завяршыў сваё разважанне заклікам да малітвы разам з Марыяй, слугой Пана, у чаканні Божага Валадарства з надзеяй і даверам.
