Кардынал Паралін здзейсніў візіт у палесцінскае пасольства
Аляксандр Амяльчэня - Vatican News
Кардынал П’етра Паралін пацвердзіў, што сітуацыя не спрыяе міру, і запэўніў, што Святы Пасад лічыць Палесцінскую дзяржаву законным прадстаўніком волі палесцінскага народа. Ён выказаў заклапочанасць Святога Пасада гуманітарнай сітуацыяй у Газе.
Два дні таму сакратар па адносінах Святога Пасада з дзяржавамі і міжнароднымі арганізацыямі, арцыбіскуп Пол Галахер размаўляў з міністрам замежных спраў Ізраіля Элі Коэнам, які заявіў, што “Ізраіль мае поўнае права абараняцца ад нападаў ХАМАС”. Як гаворыцца ў паведамленні МЗС, кіраўнік ізраільскай дыпламатыі заклікаў Святы Пасад выразна і адназначна асудзіць смяротны тэрарызм, накіраваны супраць грамадзян Ізраіля.
Пасля нядзельнай малітвы Анёл Панскі 15 кастрычніка Францішак прызнаўся, што з вялікім болем назірае за тым, што адбываецца ў Ізраілі і Палесціне. “Я думаю пра многіх, асабліва пра дзяцей і пажылых людзей. Аднаўляю заклік да вызвалення закладнікаў і заклікаю не рабіць ахвярамі канфлікту дзяцей, хворых, старых, жанчын і ўсіх мірных жыхароў”, - звярнуўся ён.
Папа настойліва папрасіў паважаць гуманітарнае права, асабліва ў сектары Газа, дзе “неабходна тэрмінова гарантаваць гуманітарныя калідоры і дапамагчы насельніцтву”. Ён абвясціў 17 кастрычніка 2023 года Днём посту і малітвы за мір у Святой Зямлі.
