Далёкаўсходнія рэлігіі далучыліся да Рымскага этычнага закліку

Аляксандр Амяльчэня - Vatican News

Дакумент быў сфармуляваны ў студзені 2023 года. Тады яго падпісалі прадстаўнікі так званых аўраамічных рэлігій: юдаізму, хрысціянства і ісламу. Зараз неабходнасць усталявання этыкі алгарытмаў прызналі і прадстаўнікі такіх рэлігійных традыцый, як будызм, індуізм, зараастрызм і бахаізм.

Яны далучыліся да гэтага звароту падчас міжрэлігійнай сустрэчы, якая праходзіла 9-10 ліпеня 2024 года ў японскай Хірасіме. Яна была арганізавана Папскай акадэміяй жыцця, японскім аддзяленнем арганізацыі Рэлігіі за мір (Religie for Peace Japan), Форумам міру ў Абу-Дабі і Камісіяй па міжрэлігійных адносінах Галоўнага рабінату Ізраіля. На мерапрыемстве прысутнічалі высокія прадстаўнікі ўрада Японіі і трох тэхналагічных гігантаў: Microsoft, IBM і Cisco.

Рэлігійныя лідары, якія ўдзельнічалі ў сустрэчы, выступілі з новым Хірасімскім зваротам. Яны нагадалі аб неабходнасці выкарыстання штучнага інтэлекту выключна на карысць чалавецтва і планеты і заклікалі міжнародную супольнасць вырашыць усе спрэчкі мірнымі сродкамі і неадкладна спыніць усе ўзброеныя канфлікты.