Нагасакі: гісторыя адраджэння праз веру і любоў
Марыя Валодзіна, Аляксандр Амяльчэня - Vatican News
Сярод многіх трагічных гісторый асабліва вылучаецца лёс Такасі Паола Нагаі, урача-радыёлага, вучонага і католіка, які стаў сімвалам надзеі і духоўнага адраджэння ў разбураным Нагасакі.
Ён выжыў пры атамнай бамбардзіроўцы Нагасакі 9 жніўня 1945 года. Вярнуўшыся дадому, ён знайшоў толькі абгарэлы ружанец сваёй жонкі Мідоры. Нягледзячы на ўласныя раны, адразу пачаў дапамагаць ахвярам.
Нагаі стаў лідарам руху за мір і адбудову горада. Ён падкрэсліваў важнасць не толькі фізічнага, але і духоўнага адраджэння. Хворы на лейкоз, ён правёў апошнія гады жыцця, пішучы кнігі і натхняючы людзей.
Такасі Нагаі выкарыстаў грошы ад літаратурнай прэміі, каб пасадзіць тысячу вішнёвых дрэў вакол руін касцёла ў Нагасакі. Гэты жэст сімвалізаваў яго веру ў адраджэнне і прыгажосць нават пасля страшэннага разбурэння.
Імператар Хірахіта асабіста наведаў Нагаі, прызнаючы яго ўклад у адраджэнне надзеі ў японскім грамадстве. Калі Такасі памёр у 1951 годзе, яго пахаванне сабрала 20 тысяч чалавек, а званы касцёлаў і будыйскіх храмаў гучалі разам, аддаючы даніну павагі вялікаму міратворцу.
Спадчына вучонага і католіка застаецца актуальнай і сёння. Яго вера ў тое, што сапраўдная перамога над злом магчымая толькі праз змяненне сэрцаў людзей, працягвае натхняць.
У 2021 годзе Каталіцкі Касцёл пачаў працэс беатыфікацыі Такасі Нагаі і яго жонкі Мідоры, прызнаючы іх духоўны подзвіг.
