Ըլլանք հօր սիրոյն լուսաւոր վկաները. Ֆրանչիսկոս Պապ

Ռոպէր Աթթարեան - Վատիկան

Կիրակի` 5 Յունուար 2024ի կէսօրին Ֆրանչիսկոս Պապը Հրեշտակ Տեառն Մարեմեան աղօթքը արտասանեց իր գրասենեակի պատուհանէն, Սուրբ Պետրոս հրապարակին վրայ համախմբուած հազարաւոր ուխտաւորներու ներկայութեամբ, որոնցմէ շատերը Հռոմ ժամանած են Յոբելենական տօնին առիթով կատարելու իրենց յոյսի ուխտագնացութիւնը։

Խաւարին մէջ լուսաւորող լոյսը

Այս առթիւ Ան մեկնաբանեց Սուրբ Յովհաննէսի Աւետարանէն քաղուած հատուածը (Յովհ 1,1-18), որ, ըսաւ Ան, մեզի կը յիշեցնէ, թէ «լոյսը խաւարի մէջ կը լուսաւորէր ու խաւարը զայն չի յաղթեց», ցոյց տալով Աստուծոյ սիրոյն զօրութիւնը, որ հակառակ բոլոր արգելքներուն ու մերժումներուն, կը շարունակէ լուսաւորել մեր ուղեւորութիւնը։

Այս սէրը կը նշմարենք Ծնունդին մէջ, երբ Յիսուս` մարդեղացած Բան, կը յաղթահարէ բաժանումներն ու նախապաշարումները, կեանքը կիսելով Մարիամի եւ Յովսէփի հետ աղքատութեան մէջ, ընկալելով կղզիացուած հովիւները ու զինք փնտռող Մոգերը։

Աշխարհը կարիքն ունի լոյսի, յոյսի ու խաղաղութեան,

«Աստուած արդարեւ կանգ չառներ մարտահրաւէրներուն դիմաց, ան հազար ու մէկ ձեւ կը գտնէ հասնելու բոլորին, մեզմէ իւրաքանչիւրին… մարդկութեան ամենամութ գիշերներուն մէջ եւս բանալով լոյսի պատուհաններ, զոր խաւարը չի կարող ծածկել» ըսաւ Նորին Սրբութիւնը ակնարկելով մերօրեայ իրականութեան, աշխարհի մը` որ կարիքը ունի լոյսի, յոյսի ու խաղաղութեան, եւ որուն մէջ կանչուած ենք նմանելու սէր Աստուծոյն, լոյսի նշոյլներ բանալով ամենուրէք...կը հրաւիրէ վախ չունենալու եւ մօտիկութեան լուսաւոր պատուհաններ բանալու, տառապողներուն, պատուհաններ ներումի, մերձեցումի եւ հաշտութեան։

Ըլլանք հօր սիրոյ լուսաւոր վկաները

«Յոբելենական տարին մեզ կը հրաւիրէ ըլլալու յոյսի պատգամաւորներ, կեանք պարգեւող կեանքի ընտրութիւններ կատարելով» ըսաւ ի միջի ալոց Սրբազան Պապը հուսկ հրաւիրեց մենք մեզի հարց տալու ի՞նչպէս կարող ենք լոյսի պատուհաններ բանալ մեր միջավայրին ու մեր յարաբերութիւններուն մէջ, եւ խորհրդածութիւնը եզրափակեց հայցելով` որ «Մարիամը մեզի օգնէ, որպէսզի ըլլանք Հօր սիրոյն լուսաւոր վկաները»։