Սրբազան Պապին նոր տարուայ առաջին Մարեմեան աղօթքը
Ռոպէր Աթթարեան - Վատիկան
Նոր տարուայ առաջին օրը` Յունուար մէկին Ֆրանչիսկոս Պապը օրը առաւօտեան ժամը տասին Սուրբ Պետրոս պազիլիքային մէջ խաղաղութեան համաշխարհային օրուան նուիրուած սուրբ պատարագով ապա կէսօրին իր գրասենեակի պատուհանէն արտասանեց 2025-ի առաջին Հրեշտակ Տեառն Մարեմեան աղօթքը որուն ընթացքին ներկայացուցած խորհրդածութիւնը կեդրոնացուց Ղուկաս Աւետարանիչէն քաղուած աւետարանական հատուածին վրայ (Ղուկ. 2,16-21), որուն մէջ առաքեալը կը պատմէ Հովիւներուն Բեթղեհէմի քարայր ժամանելուն դէպքը։
Մարիամին սիրտը
Հրեշտակի աւետիսէն ետքը անոնք «Գացին արտորալով եւ գտան Մարիամը ու Յովսէփը եւ մսուրին մէջ պառկած մանուկը» (16) գրած է աւետարանիչը եւ ասկէ մեկնելով է որ Սրբազան Պապը հրաւիրեց խորհրդածելու այն բանի մասին զոր հովիւները տեսան Բեթղեհէմի մէջ ու նաեւ այն բանի մասին որ չի տեսան` այսինքն Մարիամին սիրտը` ան «այս ամէն բաները կը պահէր ու իր սրտին մէջ կը մտածէր»։
«Յիսուս անունը եփրայերէնով կը նշանակէ «Աստուած կը փրկէ» եւ ճիշտ այս է այն ինչ որ պիտի ընէր Ան։ Տէրը արդարեւ աշխարհ եկաւ մեզի պարգեւելու համար իր իսկ կեանքը։ Աստուած ընտրեց ծնիլ մեզի համար եւ Յիսուս Աստուծոյ յաւիտենական ու անվերջ սիրոյն յայտնութիւնն է` որ խաղաղութիւն կը բերէ աշխարհին» ըսաւ Քահանայապետը դիտել տալով, որ «Մարիամ Աստուածածնայ սիրտը կը համապատասխանէ նորածին Մեսիային, որ կը դրսևորէ Հօր ողորմութիւնը: Այդ սիրտը այն ականջն է, որ լսեց Գաբրիէլ հրեշտակապետին աւետիսը. այդ սիրտը հարսի ձեռքն է, որ տրուեցաւ Յովսէփին, այդ սիրտը այն գիրկն է, որ պարուրեց Եղիսաբեթը իր ծերութեան ժամանակ: Մարիամի սրտին մէջ կը բաբախի իւրաքանչիւր արարածի փրկութեան յոյսը» հաստատեց Ֆրանչիսկոս Պապը։
Հրաւէր մտաբերելու բոլոր մայրերը
Ան ապա նշեց` որ «մայրերը միշտ ի սիրտ ունին զաւակները» եւ հրաւիրեց այսօր` «տարուան առաջին օրը, նուիրուած խաղաղութեան», մտաբերելու բոլոր մայրերը որոնց կ՛ուրախանան եւ բոլոր այն մայրերը` որոնց սիրտը լի է ցաւով, «որովհետեւ անոնց զաւակները տարահանուած են բռնութեան, ատելութեան ու հպարտութեան պատճառաւ»։
«Որքան գեղեցիկ է խաղաղութիւնը` որ ժողովուրդներուն կեանքը երջանիկ կը դարձնէ։ Որքան տմարդկային է պատերազմը, որ կը ճմլէ մայրերուն սրտերը» ըսաւ ապա Սրբազան Պապը հրաւիրելով հարց տալու մենք մեզի` եթէ հասկցած ենք ու կը խոկանք Յիսուսի ծննդեան խորհուրդի մասին ու եթէ մեր կարգին փրկութեան պարգեւին կը համապատասխանենք խաղաղութեան, ներումի եւ հաշտութեան արարքով մը։
«Մարիամ Աստուծոյ Սուրբ Մայրը` մեզի թող սորվեցնէ մեր սրտին մէջ պահել ու աշխարհին վկայել Աւետարանին ուրախութիւնը» ըսաւ Ֆրանչիսկոս Պապը եզրափակելով խորհրդածութիւնը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
