Յիսուսին հանդիպումը Նիկոդէմոսէն հետ. խաւարին մէջ եւս կարող ենք գտնել լոյսը

Ռոպէր Աթթարեան - Վատիկան

«Փարիսեցիներէն մարդ մը կար Նիկոդէմոս անունով, որ Հրեայ իշխան մըն էր։ 2 Ասիկա գիշերով Յիսուսին եկաւ եւ ըսաւ անոր. «Ռա՛բբի, գիտենք թէ դուն Աստուծմէ վարդապետ եկած ես, վասն զի մէկը չի կրնար ընել այն հրաշքները, որոնք դուն կ’ընես, եթէ Աստուած իրեն հետ չըլլայ»։ 3 Պատասխան տուաւ Յիսուս եւ ըսաւ անոր. «Ճշմարիտ ճշմարիտ կ’ըսեմ քեզի. ‘Եթէ մարդ մը նորէն չծնանի, չի կրնար Աստուծոյ թագաւորութիւնը տեսնել’»։ Յովհաննէս Աւետարանիչէն քաղուած այս հատուածը առանցքը կազմեց 19 Մարտին չորեքշաբթի օրուայ հրապարակային ընդհանուր ունկնդրութեան առիթով պատրաստուած Ֆրանչիսկոս Սրբազան Քահանայապետին հրատարակուած գրաւոր խորհրդածութեան, որ ինչպէս նախորդ չորեքշաբթիները ի տես Նորին Սրբութեան տակաւին հիւանդանոց գտնուելուն, տարածուեցաւ Վատիկանեան ու այլ լրատուամիջոցներու միջոցաւ։

Յիսուսին հանդիպումները` յոյսի հանդիպում 

Խորհրդածութիւնը կեդրոնացած է «Յիսուս Քրիստոս մեր Յոյսը» նիւթին վրայ ու յատկապէս աւարտելէ ետք Յիսուսի մանկութեան դրուագները Սրբազան Պապը ուզած է անդրադարձ կատարել Աւետարանին մէջ պատմուած Յիսուսի հանդիպումներուն, «հասկնալու համար թէ ի՞նչ ձեւով է. որ Յիսուս յոյս կը պարգեւէ» գրած է Ան.

«Արդարեւ կան կեանքը լուսաւորող եւ յոյս ներշնչող հանդիպումներ» նշած է Նորին Սրբութիւնը խորհրդածութեան մէջ որպէս առաջին հանդիպում ներկայացնելով Նիկոդէմոսի հետ հանդիպումը` ու զայն որակելով «մարդ մը` որ իր պատմութեամբ կը բացայայտէ թէ կարելի է դուրս գալ խաւարէն ու գտնել Յիսուսին հետեւելու քաջութիւնը»։

Նիկոդէմոսը լոյսը փնտռող մարդ

Նիկոդէմոս կը փնտռէ լոյսը ներքին շփոթի ու խաւարի պահի մը ընթացքին։ Ան Յիսուսին կը մօտենայ գիշերով, որ խորհրդանիշն է խաւարին մէջ գտնուող սրտի մը։ Յիսուս Անոր հետ կը խօսի «վերէն ծնունդի» մը մասին, որ կը ներկայացնէ հարկաւոր փոփոխութիւնը` ընդունելու համար յոյսը։

Կեանքը փոխակերպող Սուրբ Հոգին

Այս փոփոխութիւնը կարելի է Սուրբ Հոգիին միջոցաւ, որ նոր կեանք կը պարգեւէ եւ Նիկոդէմոս հակառակ սկզբնականն դժուարութիւններուն հասկնալու համար Յիսուսին խօսքերը, թոյլ կու տայ կերպարանափոխուիլ եւ վերջաւորութեան ան պիտի ըլլայ այն անձերէն մին, որոնք հոգ կը տանին Յիսուսի մարմնին, անոր մահուընէն ետքը։

Նիկոդէմոսին ուղեւորութիւնը ցոյց կու տայ, որ նաեւ խաւարին մէջ մենք կարող ենք գտնել լոյսը ու թէ փոփոխութիւնը, որքան ալ, որ վախցնելիք ըլլայ, կը մնայ հիմնական` աճելու համար հաւատքի մէջ։

Հայեացքը սեւեռել Խաչեալին

Ինչպէս անապատին իսրայէլացիները դիմագրաւեցին իրենց վախերը՝ նայելով բրոնզէ օձին, մենք ալ կարող ենք նայիլ Խաչելութեան, որ մեզ կ՛ազատէ մեր ամենախոր վախերէն:

«Նիկոդէմոսի նման մենք ալ մեր հայեացքը ուղղենք դէպի Անոր որ խոցուեցաւ, թոյլ տանք, որ մենք եւս հանդիպինք Յիսուսին։ Անոր մէջ կը գտնենք յոյսը դիմագրաւելու համար կեանքին փոփոխութիւնները եւ վերածնելու կրկին», գրած է Նորին Սրբութիւնը եզրափակելով խորհրդածութիւնը։