Бискупот Стојанов повика на молитва за Божја помош во справувањето со пожарите

Бискупот Стојанов, во повикот до свештенството, верниците и сите луѓе со добра волја нагласува: Почнувајќи од денес 18 јули и викендот кој е пред нас во сите католички храмови во Македонија да се моли за директно вклучените во гаснењето на пожарите: пожарникарите, припадниците на АРМ, полицијата, медицинските, државните и општинските служби, граѓански здруженија и сите луѓе кои се на терен.

Во апелот тој истакнува: „Во петок 19 јули во 12:00 часот отворете ги сите храмови и организирајте молитва за Божја помош, во справувањето со пожарите“.

Понатаму епископот Стојанов повикува верниците да бидат запознаени со забраната од надлежните институции за движење во шуми и шумско земјиште и за недозволеното палење оган на отворено и да ги следат и почитуваат упатствата од ЦУК. Во период на зачестени пожари потребно е одговорно однесување и поддршка на службите и лицата кои се справуваат со пожарите.

Воедно бискупот изрази голема благодарност до сите кои се борат со огнените стихии за да спасат човечки животи, имоти и природни богатства. Посакувајќи им Божји благослов на сите ги уверува во своите молитви за застапништво пред Господ Бог.