Папата Фрањо на Велики Четврток ќе служи во женскиот затвор Ребибија

Уште еден Велики Четврток во затвор, за да слави Мисата Господова вечера со затвореници, оваа година со жени. На 28 март 2024 година, папата Фрањо ќе оди во женскиот затвор Ребибија, како што тоа го направи и во 2015 година кога отиде во тој римски затвор во посета на „Новиот комплекс“ каде служеше Миса Господова вечера со повеќе од 300 затвореници и персоналот, и за време на обредот миење на нозе им ги изми нозете на шест мажи и шест жени. Оваа година Светиот Отец ќе го посети женскиот затвор изграден во 50-тите години на минатиот век, моментално најголемиот од четирите женски затвори во Италија и еден од најголемите во Европа, каде што има големо присуство на жени од странство.

Веста ја соопшти Префектурата на Папскиот дом во соопштение во кое се вели: „На Велики Четврток, 28 март 2024 година, во 16.00 часот, Светиот Отец приватно ќе оди во женскиот затвор Ребибија во Рим, за да слави Света Миса Господова вечера и да се сретне со затвореничките и вработените во таа институција“.

Традиција од почетокот на понтификатот

По единаесет години, папата Фрањо ја продолжува традицијата започната на самиот почеток на неговиот понтификат свечената Миса Господова вечера повеќе не ја служи во римската катедрала, во базиликата Свети Иван Латерански, туку оди на симболично место, на раскрсницата на болката но и на повторното раѓање. Таа традиција папата Фрањо ја донесе во Рим од Буенос Аирес, каде како надбискуп основните моменти на раѓањето на христијанството секогаш сакал да ги живее среде егзистенцијалните периферии.