Папата Фрањо: Во свет на оружје и малку родени деца, да работиме за достоинството на животот

Да продолжиме да бидеме отворена и внимателна заедница, подготвена да го прифати, слуша и следи нашиот ближен, пророчки во храброто навестување на Евангелието и желни да излеземе од нашиот сопствен круг за да се сретнеме со другите, особено со оние кои живеат на егзистенцијалните периферии на нашето време - ова, за папата Фрањо, треба да го означи патот на Италијанското католичкото движење на возрасни извидници (MASCI), кое, основано на 20 јуни 1954 година, оваа година наполни седумдесет години. Поводот за аудиенцијата кај Папата беше токму таа годишнина, која ја прославуваат под мотото „Повеќе живот за живот“ и со три проекти поврзани со важни вредности: донација на термална колевка на Центарот за прва помош и прием во Лампедуза; изградба на работилница за наутичка столарија во Замбија; и садење шума во Аргента, во провинцијата Ромања. Во својот говор, папата Фрањо се осврна на секој од нив со цел да размисли за вредноста на животот, општото добро и зачувувањето на планетата.

Љубов кон животот

Во ова време на драматичо опаѓање на наталитетот, изгледа дека луѓето ја изгубиле волјата за раѓање и грижата за другите, а можеби и волјата за живот; затоа лулката подарена на Лампедуза нè потсетува на љубовта кон животот што се раѓа - истакна Папата – на радоста на раѓањето на детето, на очекувањето и надежта за тоа што ќе стане. Дополнително, лулката ни зборува за семејството, гостопримливо и безбедно гнездо за малите, заедница заснована на бесплатна љубов и за вниманието кон животот во секој негов период, особено кога со текот на годините човекот станува поранлив и има потреба од помош. Затоа, за Папата тоа е значаен подарок за Центарот за прва помош и прием во Лампедуза.

Љубовта кон животот е секогаш отворена и универзална, таа го сака доброто на сите, без разлика на потеклото или која било друга состојба.

Да ги претвориш Божјите дарови во инструменти на доброто

Што се однесува до столарската работилница, симбол драг на нас христијаните - како што рече римскиот бискуп - затоа што Исус го избрал како место каде што ќе се подготви за својата мисија работејќи понизно во неа, нè потсетува колку добро може да направи човештвото, додека денес многу - можеби премногу – се зборува за производство на оружје за да се води војна - истакна Папата и истакна дека инвестицијата која носи најголем приход е токму производството на оружје.

Да вложуваш за да уништуваме; да заработиме пари преку уништување - нашиот повик нè упатува на основниот повик на човекот, да не ги претвора Божјите дарови во инструменти на смртта, туку во алатки на доброто, со заеднички напор да изградиме праведно и мирно општество, во кое на сите им се дава можност за достоинствен живот. Достоинство на животот. Да се работи за достоинството на животот.

Почитувањето на природата е вредност што треба повторно да се открие

Конечно, шумата, третиот проект на италијанското католичко движење на возрасни извидници, осмислен во спомен на Дон Џовани Минцони, храбар свештеник кој, во контекст на насилничко и препотентно непријателство, се бореше и преку извидништвото, со цел да ги едуцира младите за цврст христијански живот ангажиран во добротворното општество. Ова го инспирираше папата Фрањо да ја поттикне одговорноста за заедничкиот дом што Создателот ни го довери на нашите раце и да ги насочи своите мисли кон целосна екологија.

Почитта, љубовта и директниот контакт со природата се посебни карактеристики на извидништвото уште од неговите почетоци. Тоа се вредностите што ни се толку многу потребни денес, додека се откриваме сè понемоќни пред последиците од неодговорната и кратковидна експлоатација на планетата; ние заробениците на животните стилови и однесувања кои се толку себично глуви на секој повик на здравиот разум, колку што се и трагично самоуништувачки; однесувања нечувствителни на крикот на ранетата земја, како и на гласот на бројните браќа и сестри неправедно маргинализирани и исклучени од правичната распределба на добрата.

Во врска со сето ова, папата Фрањо го истакна едноставниот, скромен и почитуван извиднички стил како одличен пример за сите и ги охрабри присутните, членови на движењето основано од Роберт Баден-Пауел, да истраат на својот пат, како што вели нивното мото, „еднаш извидник, засекогаш извидник“.