Ангел Господов: Доследните христијани својата молитва ја прават конкретна во љубовта кон другите

Папата Фрањо ги повика верниците да не го сведуваат односот со Бог на надворешни гестови. Во неделното обраќање, за евангелието кога Исус зборува за чистите и нечистите, Светиот Отец потсети дека тоа е тема која им била многу драга на тогашните луѓе. И воглавно е поврзана со почитувањето на ритуалите и правилата на однесување во кои треба да се избегнува секаков контакт со работи или луѓе кои се сметаат за нечисти.

Во контекст на книжниците и фарисеите, кои биле строги почитувачи на тие правила, Исус ги повикува учениците да размислуваат за значењето на чистотата и објасни дека тоа не е поврзано со надворешни ритуали, туку пред се со внатрешните расположенија, рече Папата.

Исто така, тој, меѓу другото, објасни дека станува збор за ритуализам кој не води кон раст во добрината, а понекогаш дури може да доведе до занемарување, па дури и до оправдување избори и ставови спротивни на милосрдието, што ја ранува душата и го затвора срцето. А тоа е исто така важно за нас денес.

Не може, на пример, по излегување од светата Литургија да застанете во дворот на црквата грдо и безмилосно да озборувате секого и за се. Ваквите мрморења го уништуваат срцето, ја уништуваат душата. Не може така. Одиш на света Литургија, а на влезот правиш такви работи. Тоа е лошо. Или во молитвата се претставуваш како многу побожен, а дома си ладен и оддалечен од семејството или ги запоставуваш постарите родители на кои им е потребна помош и друштво. Тоа е двоен живот. И не може да се прави така, а токму тоа го правеа фарисеите.

Тој предупреди дека понекогаш дури и се волонтира и се прават некои филантропски гестови, но одвнатре негуваме омраза кон другите, ги презираме сиромашните и најмалите или се однесуваме нечесно во работата. Тоа го сведува односот со Бога на надворешни гестови, додека внатре остануваме непропустливи на очистувачкото дејство на неговата благодат, рече Папата, а создадени сме за чистота, нежност и љубов.