Kisha dhe bota, në lutje për Benediktin XVI
R.SH. – Vatikan
E menjëhershme dhe prekëse, përgjigja e gjithë botës për thirrjen e djeshme të Papës Françesku, që në përfundim të audiencës së përgjithshme, kërkoi lutje për Benediktin XVI, shëndeti i të cilit është rënduar. Nga të katër anët, mbërrijnë komunikata për pjesëmarrje në lutje, gjë që konfirmohet edhe nga mesazhet në rrjetet shoqërore të Konferencave Ipeshkvnore, të krerëve të Kishave të ndryshme dhe të autoriteteve civile të planetit.
Kisha në Itali
“Sigurojmë se do ta kujtojmë në lutje në kishat tona, me vetëdijen, siç na pati thënë ai vetë, se ‘sado të ashpra të jenë sprovat, sado të vështira problemet, sado të rënda vuajtjet, Zoti nuk do të na lëshojë kurrë dore, nga ato duar që na krijuan, na mbështesin dhe na shoqërojnë në udhën e jetës, sepse drejtohen nga një dashuri pa fund e besnike”, deklaroi që dje kreu i Konferencës Ipeshkvnore Italiane, kardinali Matteo Zuppi. Dioqeza e Romës u mblodh menjëherë në lutje për Benediktin XVI. "Bashkësitë famullitare, kapelanitë, rregulltarët dhe rregulltaret: gjithë besimtarët e dioqezës dhe gjithë gratë e burrat vullnetmirë, që banojnë në Romë - lexohet në faqen e internetit të dioqezës - duke kujtuar me mirënjohje rrugën e bërë së bashku me Ipeshkvin e nderit, e shoqërojnë në këtë çast vuajtjeje dhe sprove me lutje drejtuar Zotit që ta 'ngushëllojë dhe ta mbështesë deri në fund, në këtë dëshmi dashurie për Kishën'”.
Lutja e kreut të ipeshkvijve gjermanë
Imzot Georg Bätzing, ipeshkëv i Limburgut dhe kryetar i Konferencës Ipeshkvnore Gjermane, botoinjë lutje të veçantë kushtuar Papës së Nderit: "O Jezus, Shpëtimtari dhe Shëlbuesi ynë - shkruan imzot Bätzing - ndihmoje në sëmundjen dhe dobësinë e tij. Bëj që ta ndiejë afërsinë tënde ngushëlluese. Mbështete, jepi forcë dhe duku para tij, në këto orë të errëta, si dritë, që jep shpresë. Bëj që ta ndiejë afërsinë e sa e sa njerëzve, të cilët, tani, po ndërmjetësojnë për të në lutje".
Konferencat Ipeshkvnore të SHBA-ve dhe të Amerikës Latine
Ndërkaq, lutja e publikuar në faqen e internetit të ipeshkvijve amerikanë tingëllon kështu: “O Zot i Plotfuqishëm dhe i Amshuar, Ti je shëndet i përjetshëm për ata, që besojnë në ty. Dëgjoji lutjet tona për shërbëtorin tënd të sëmurë, Benediktin, për të cilin kërkojmë ndihmën e mëshirës sate të dhembshur”. Komunikata për shtyp dhe lutje mund të lexohen në faqet e internetit të shumë Konferencave Ipeshkvnore të Amerikës Latine, si në atë të Kilit, Perusë, Kosta Rikës dhe Kolumbisë. Përmes tyre, ftohen besimtarët të luten për Papën e Nderit dhe shprehen ndjenjat e mirënjohjes për shërbimin e jashtëzakonshëm e bujar të Benediktit XVI për Kishën universale. Duke iu përgjigjur ftesës së Këshillit Ipeshkvnor të Amerikës Latine, CELAM, bashkësitë kishtare janë bashkuar të gjitha në lutje për t’i kërkuar Zotit “ta ngushëllojë dhe ta mbështesë deri në fund, në këtë dëshmi dashurie për Kishën", siç tha dje Papa Françesku.
