Papa, të rinjve rumunë: përdorini rrjetet sociale, pa u ngujuar në jetën virtuale

R. SH. - Vatikan

“Bëhuni mbartës të shpresës dhe ndërtues të urave, duke përdorur çdo mjet për të mbjellë mirësi dhe dashuri në botë”. Kështu u shkruan Papa Françesku të rinjve rumunë të dioqezës së Iasit, duke iu përgjigjur letrës së tyre, dërguar në gjysmën e majit përmes kardinalit Pietro Parolin. Sekretari i Shtetit merrte pjesë në takimin e rinisë dioqezane në Iasi, më 18 dhe 19 maj, i ftuar nga ipeshkvi Iosif Păuleț.

Në mesazhin e tij, Papa inkurajon të rinjtë që të përdorin rrjetet sociale “me guxim dhe frymë krijuese, duke transmetuar vlerat, që ndërtojnë: miqësinë, paqen, dialogun ndërmjet grupeve dhe kulturave etnike, familjes dhe vlerave të krishtera”. Në vijim i nxit të ruhen për të mos u bërë skllevër të celularit dhe për të mos mbetur të mbërthyer në jetën virtuale, në dëm të jetës reale.

Pasuria e vërtetë është në marrëdhëniet e drejtpërdrejta e të sinqerta

 “Dilni në botë, takoni njerëz, dëgjoni historitë e tyre, shikoni vëllezërit dhe motrat tuaja në sy. Pasuria e vërtetë gjindet në marrëdhëniet njerëzore të jetuara çdo ditë, në lidhje të drejtpërdrejtë dhe të sinqertë".

 Më tej, Papa i fton të rinjtë të marrin pjesë në takimin kombëtar të të rinjve, i cili do të mbahet në shtator, në rrethin e Brasovit.

"Do të jetë mundësi e çmuar për t'u rritur së bashku në fe - shkruan ai - për të shkëmbyer përvoja dhe për të forcuar rrugën tuaj të krishterë".

“Mos harroni të luteni për mua”- u kujton në fund Papa Françesku - “Mbështetja juaj shpirtërore është një dhuratë e paçmuar, që më ndihmon t'i shërbej Kishës dhe njerëzimit”.