መዓርገ ዲቁና ኣብ ኤጳርቅና ከረን
ኣባ ፍስሃ ተኪኤ - ኤጳርቅና ከረን
እዞም ብኢድ ብፁዕ ኣቡነ ኪዳነ የዕብዮ መዓርገ ዲቁና እተቐበሉ፦
1. ዲ. ፍረእግዚእ ግንቦት ካብ ደበረ ቅዱስ ጊዮርጊስ ፈርሔን
2. ዲ. ኣርበድ ዓድላን ካብ ደብረ ቅዱስ ሚካኤል ኣሽራ
3. ዲ. ሳሙኤል በረኸት ካብ ቤተጸሎት ቅ/ሥላሴ ጀምበረቕ (ቍምስና ደብረ ማርያም ቁስቋም ሽዕብ) እንክኾኑ።
እዞም ዲያቆናት እዚኣቶም ብትምህርቲ ፍልስፍናን ሥነ መልኮትን ኣብ ደብረ መድኃኔ ዓለም ዓቢይ ገዳም ዘርኣክህነት ኣሥመራ ክህነታዊ ሥነ መዕበያ ዝርኸቡ ኮይኖም፣ ኣብቲ ወለዲን፡ ቤተሰብን፡ ካህናትን ደናግልን፣ ካብ ዝተፈላለዩ ቍምስናታት ካቶሊካዊ ኤጳርቅና ከረን ዝመጹ ምእመናንን ኣብ ዝተረኽቡሉ ብኣሕሉቖም ተሰንዮም መዓርገ ዲቑና ተቀቢሎም፡፡
ብፁዕ ኣቡነ ኪዳንነ ጳጳሳ ካቶሊካዊ ኤጳርቅና ከረን ኣብ መስዋዕተ ቅዳሴ ኣብ ዝለገስዎ ናይ ዕለቱ ስብከት ቃል ኣምላኽ፡ “ጸዋዕታ ዲቁናን ክህነትን ተልእኾ ኮይኑ ንዝተለኣኽካዮ ምብጻሕ ጥራይ ዘይኮነ እናተመሃርካ ትነብሮ፡ እናነበርካ እትምህሮ ጉዕዞ ቅድስና ኢዩ፣” በሉ።
ዓለም ንምሁራትን ሃብታማትን፣ ነቶም ኣብ ቅድሚ ሰብ ምርኡያት ንዝኾኑ ሰባት ኢያ ትመርጽ፡ ጐይታናን መድሓኒናን ኢየሱስ ክርስቶስ ግና ነቶም ትሑታትን ኣብ ዘመኖም ምርኡያት ዘይነበሩ ገፈፍቲ ዓሳ ገሊላውያን ኢዩ መሪጹ ሓዋርያት ዝገበሮም፡ ስለዚ ጸዋዕታ ኣብ ክእለትን ዓቅምን ደቂሰባት ዘይኮነ ኣብ ጸጋ ኣምላኽ ተኣሚንካ ትነብሮ ህይወት ብምዃኑ ተቀበልቲ ቀረጽ ከም በዓል ለዊ (ማር 2፡13-17) ድማ ብምሕረት ኣምላኽ ተሓርዮም።
ንሓኪም ሕሙማት እምበር ጥዑያት ከም ዘየድልይዎ ዝጠቀሰ እዚ ቅዱስ ቃል እዚ፡ ጻድቃናት ዘይኮኑ ሓጥኣን ኢዮም ብጸጋ ኣምላኽ ተማሒሮም ንምሕረት ኣምላኽ ብተልእኾ ዘበስሩ እሞ፣ ነቲ ንድኻምነትናን ሓጢኣትናን ከይቆጸረ ጸጋ ዲቁናን ክህነትን ዝሃበና ኣምላኽ ነመስግን።
ንወለዲን ንዝኾስኮስዎም መምሃራንን ኣብ ሰነ-መዕበያ ዘሰነይዎም ካህናትን፣ ገበርቲ ሠናይን ሰብ ድማዖምን እውን ነመስግን ክብሉ ስብከቶም ዛዚሞም።
