Папа: хрост выдаляе любыя этнічныя і сацыяльныя адрозненні
Аляксандр Амяльчэня - Vatican News
Папа працягнуў цыкл катэхез, прысвечаных Пасланню да Галатаў. “Адрозненні і канфлікты, якія ствараюць падзелы, не павінны існаваць сярод тых, хто верыць у Хрыста. Наадварот, наша пакліканне – больш канкрэтны і бачны заклік да адзінства ўсяго чалавечага роду”, - падкрэсліў Францішак.
Каментуючы словы аб тым, што вера ў Хрыста дазваляе нам стаць па-сапраўднаму Божымі дзецьмі, Святы Айцец заахвоціў кожнага верніка з удзячнасцю ўзгадаць свой хрост, у якім была атрымана сыноўская годнасць. "Тыя, хто прымаюць яго, перамяняюцца ў глыбіні сваёй сутнасці, унутры сябе і атрымліваюць новае жыццё, тое, што дазваляе ім звярнуцца да Бога і назваць Яго "Абба, Ойча"(Гал 4, 6)", - заўважыў Пантыфік.
Францішак нагадаў, што хрост выдаляе любыя падзелы. “Роўнасць у Хрысце пераадольвае сацыяльныя адрозненні паміж поламі, устанаўліваючы роўнасць паміж мужчынамі і жанчынамі, якая ў той час была рэвалюцыйнай, а сёння патрабуе ўмацавання”, - падкрэсліў Святы Айцец. Ён звярнуў увагу на тое, што гэтая роўнасць вынікае з самога факту хросту.
“Усё, што паглыбляе адрозненні паміж людзьмі, часта прыводзячы да дыскрымінацыі, перад Богам больш не мае ніякіх падстаў, дзякуючы збаўленню, здзейсненаму ў Хрысце. Важнай застаецца вера, якая дзейнічае на шляху адзінства, пазначаным Духам Святым. Наша задача – рашуча ісці гэтым шляхам”, - сказаў Папа, завяршаючы катэхезу.
