Анёл Панскі: Папа заклікаў вярнуцца да сутнасці хрысціянства
Аляксандр Амяльчэня - Vatican News
"Гэтае пытанне з'яўляецца істотным таксама для нас, для нашага жыцця і для шляху нашай веры", - падкрэсліў Францішак, звяртаючыся да вернікаў, якія сабраліся на плошчы святога Пятра ў Ватыкане. Ён нагадаў, што і мы, сучасныя хрысціяне, часта адчуваем сябе разгубленымі сярод мноства спраў і задаёмся пытаннем: што ў рэшце рэшт з'яўляецца самым важным?
На прыкладзе дыялогу Езуса з кніжнікам Пантыфік паказаў, як Збаўца аб'ядноўвае дзве запаведзі, якія раней былі падзеленыя: любоў да Бога і любоў да бліжняга. "Гэта падсумоўвае ўвесь закон і прарокаў, - падкрэсліў Францішак. - Мы маглі б нават сказаць: гэта – сэрца хрысціянскага жыцця!"
Святы Айцец адзначыў, што ўсе мы маем патрэбу вярнуцца да сэрца жыцця і веры. Ён падкрэсліў, што для вучня Хрыста важныя не знешнія практыкі, такія як ахвярапрынашэнні, а схільнасць сэрца, з якой ён адкрываецца на Бога і братоў у любові. "Мы можам рабіць шмат рэчаў, але рабіць іх толькі для сябе і без любові, з няўважлівым ці закрытым сэрцам", – дадаў ён.
Разважаючы над гэтай тэмай, Папа заклікаў вернікаў штодзённа рабіць рахунак сумлення, задаючы сабе тры асноўныя пытанні: "Ці з'яўляецца любоў да Бога і бліжняга цэнтрам майго жыцця? Ці падштурхоўвае мая малітва да Бога ісці насустрач братам і любіць іх бескарысліва? Ці пазнаю я ў абліччы іншых прысутнасць Пана?"
Пантыфік таксама звярнуў увагу на тое, што калі Пан прыйдзе, Ён спытае нас перш за ўсё пра любоў, якую мы змаглі ахвяраваць, і пра тую, якую не падарылі. Менавіта таму важна замацаваць у сэрцы найважнейшую запаведзь – любіць Пана Бога і бліжняга як самога сябе.
Завяршаючы свае разважанні, Францішак звярнуўся да Найсвяцейшай Панны Марыі, якая насіла закон Божы ў сваім беззаганным сэрцы, з просьбай дапамагчы вернікам любіць Пана і братоў. Ён падкрэсліў, што менавіта Яна з'яўляецца дасканалым прыкладам таго, як любоў да Бога непадзельная з любоўю да бліжняга.
