«Աղօթենք Տիրամօր որպէսզի աշխարհիս համար ընդունի ներում եւ խաղաղութիւն». Ֆրանչիսկոս Պապ
Ռոպէր Աթթարեան - Վատիկան
Քոլլեմաճճոյի մէջ գլխաւորած սուրբ պատարագի աւարտին, Կիրակի 27 օգոստոսի առաւօտեան Ֆրանչիսկոս Սրբազան Պապը նոյն վայրէն արտասանեց Հրեշտակ Տեառն Մարեմեան աղօթքը. որմէ առաջ խօսքը ուղղելով ներկաներուն ողջունեց զանոնք ու ողջոյնի խօսք ուղղեց նաեւ բոլոր անոնց, որոնք արարողութեան հետեւեցան հերակապ միջոցներով։ Ան ապա շնորհակալութիւն յայտնեց քաղաքացիական իշխանութիւններուն, Արքեպիսկոպոսին եպիսկոպոսներուն ու կղերական դասին եւ կամաւորներուն։
Աղօթք եւ զօրակցութիւն Փաքիստանի ժողովուրդին
«Այս վայրէն, որ տառապեցաւ ծանր աղէտէ մը, կ՜ուզեմ իմ մօտիկութիւնս արտայայտել Փաքիստանի ժողովուրդին, որ թիրախ է աղէտալի հեղեղումներու։ Կ՜աղօթեմ զոհուածներուն համար, վիրաւորներուն եւ տեղահանուածներուն համար եւ կ՜աղօթեմ, որպէսզի իրականացուի արագ ու վեհանձն միջազգային զօրակցութիւնը» ըսաւ Ֆրանչիսկոս Պապը, հրաւիրելով հաւատացեալները աղօթելու Տիրամօր` որպէսզի աշխարհիս համար ընդունի ներում եւ խաղաղութիւն։
Աղօթք աշխարհի խաղաղութեան համար
«Աղօթենք ուքրանացի ժողովուրդին համար ու բոլոր ժողովուրդներուն համար, որոնք կը տառապին պատերազմներու պատճառաւ։ Խաղաղութեան Աստուածը ազգերու պատասխանատուներու սրտերուն մէջ վերակենդանացնէ գթութեան եւ ողորմածութեան քրիստոնէական եւ մարդկային նշանակութիւնը։ Մարիամ ողորմութեան Մայր եւ խաղաղութեան Թագուհի` աղօթէ մեզի համար», ըսաւ Սրբազան Պապը սկիզբ տալով Հրեշտակ Տեառն Մարեմեան աղօթքին որմէ ետք գլխաւորեց Քոլլեմաճճօ Սուրբ Կոյս Մարիամի Պազիլիքային Կղեստինեան Ներումի Սուրբ Դռան արարողութիւնը։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
