Կիրակնօրեայ Մարեմեան աղօթք. Բարտիմէոս կոյրին բժշկութիւնը առանցքը կազմեց Ֆրանչիսկոս Պապին խորհրդածութեան

Ռոպէր Աթթարեան – Վատիկան

Կիրակի` 27 Հոկտեմբեր 2024ի առաւօտեան Սուրբ Պետրոս Պազիլիքային մէջ մատուցած Սիւնհոդոսականութեան նուիրուած Եպիսկոպոսական Սիւնհոդոսի եզրափակիչ պատարագէն ետքը Քահանայապետը, կէսօրին, առաքելական պալատի իր գրասենեակի պատուհանէն արտասանեց Հրեշտակ Տեառն Մարեման աղօթքը Սուրբ Պետրոս հրապարակին վրայ համախմբուած հազարաւոր ուխտաւորներու ներկայութեամբ։ 

Մեկնաբանելով Մարկոս  Աւետարանիչէն  քաղուած Բարտիմէոս կոյրին բժշկութիւնը  պատմող հատուածը (Մարկ. 10,46-52) Նորին Սրբութիւնը, նկատել տուաւ թէ ինչպէս այդ աղքատ ու մուրացկան մարդը հազիւ իմացաւ որ Յիսուս Նազովրեցին կ՛անցի այնտեղէն սկսաւ աղաղակել ու ըսել. «Յիսո՛ւս, որդի՛ Դաւթի, ողորմէ՛ ինծի»։ Յիսուս իր մօտ կանչելով կոյրը Անոր հարց կու տայ «Ի՞նչ կ’ուզես որ քեզի ընեմ» եւ կոյրը կը պատասխանէ «Ռաբբունի, կ’ուզեմ որ աչքերս բացուին»։ Եւ Յիսուս անոր կ՛ըսէ. «Գնա՛. քու հաւատքդ քեզ բժշկեց»։ 

«Այս հանդիպումէն նկատի առնենք երեք երեւոյթներ աղաղակը, հաւատքը եւ ուղեւորութիւնը» ըսաւ Սրբազան Պապը։

Աղաղակը

Նախ եւ առաջ Բարտիմէոսի աղաղակը` որ միայն օգնութեան խնդրանք մը չէ այլ հաստատում, թէ ինք գողութիւն ունի։ Կարծես ան կ՛ուզէ ըսել «Ինծի նայեցէք։ Յիսուս` ես չեմ տեսներ։ Դուն ինծի կը տեսնե՞ս»։  

«Այո` Յիսուս կը տեսնէ այդ մարդը մտիկ կ՛ընէ անոր, մարմնի եւ սրտի ականջներով» ըսաւ Ֆրանչիսկոս Պապը հրաւիրելով նայիլ մեր վերաբերմունքին երբ կը հանդիպինք մուրացկանի մը, եթէ այլուր կը դարձնենք մեր հայեացքը, եթէ կ՛անտեսենք զայն, կարծես թէ գոյութիւն չունի։ 

Հաւատքը

Մենք կը լսե՞նք մուրացկաններուն ձայն» հարց տուաւ Քահանայապետը եւ մատնանշեց երկրորդ երեւոյթին` հաւատքին. Յիսուս կ՜ըսէ  «գնա քու հաւատքդ քեզ փրկեց»։ Արդարեւ Բարտիմէոսը կը տեսնէ որովհետեւ կը հաւատայ։ Քրիստոս անոր աչքերուն լոյսն է։  Տէրը կը նկատէ թէ ինչպէս Բարտիմէոսը իրենց կը նայի։ Իսկ մենք ի՞նչպէս կը նայինք մուրացկանին։ Կ՛անտեսե՞նք զայն։ Անոր կը նայինք Յիսուսին նման։ Կարո՜ղ ենք հասկնալ անոր աղաղակը։ Եւ երբ ողորմութիւն կը կատարենք մենք կը նայի՞նք անոր աչքերուն։ Կը դպչի՜նք անոր ձեռքին» հարցեր ուղղեց Նորին Սրբութիւնը ապա ակնարկեց երրորդ կէտին` ուղեւորութիւնը։ 

Ուղեւորութիւնը

Բուժուած Բարտիմէոսը կը հետեւէր Յիսուսին։ «Սակայն մեզմէ իւրաքանչիւրը Բարտիմէոս մըն է,կոյր է, որ կը հետեւի Յիսուսին» յարեց Նորին Սրբութիւնը այլ հարցեր ուղղելով մեր վերաբերմունքի մասին` եթէ մենք մօտիկութիւն կը ցուցաբերենք աղքատին, ու եթէ կը կատենք թէ Յիսուսն է որ կը գտնուի անոր մէջ։ 

«Ողորմութիւնը բարեգործութիւն չէ» ըսաւ Ֆրանչիսկոս Պապը, ան` որ շնորհք կը ստանայ  անորմէ անիկա է որ զայն կը կատարէ, որովհետեւ թոյլ կու տայ որ Տէրը իրեն նայի» յարեց Ան ու խորհրդածութիւնը աւարտեց հրաւիրելով միասին աղօթել Մարիամին` «որպէսզի պահապան կանգի մեր ուղեւորութեան, Քրիստոսի լոյսին ներքոյ»։