ശിശുവിൻറെ നയങ്ങളിൽ പ്രപഞ്ചസ്രഷ്ടാവിൻറെ വെളിച്ചം ദർശിച്ച ജ്ഞാനികൾ !

ജോയി കരിവേലി, വത്തിക്കാൻ സിറ്റി

പൗരസ്ത്യ ദേശത്തു നിന്നെത്തിയ മൂന്നു ജ്ഞാനകിൾ ഒരു ദരിദ്ര ശിശുവിൽ ദൈവസാന്നിദ്ധ്യം തിരിച്ചറിയുകയും ആ ശിശുവിനെ ആരാധിച്ച്, ധ്യാനിച്ച്, അവർ പുതിയ മനുഷ്യരായി തിരിച്ചു പോകുകയും ചെയ്ത അവരുടെ നിർണ്ണായകാനുഭവം നമ്മെ സംബന്ധിച്ചും സുപ്രധാനമാണെന്ന് മാർപ്പാപ്പാ.

എപ്പിഫനി, അഥവാ, പ്രത്യക്ഷീകരണ തിരുന്നാൾ, അല്ലെങ്കിൽ ദനഹാതിരുന്നാൾ ആചരിക്കപ്പെട്ട ശനിയാഴ്‌ച (06/01/24) വത്തിക്കാനിൽ നയിച്ച പൊതുവായ മദ്ധ്യാഹ്നപ്രാർത്ഥനയ്ക്കു മുമ്പു നടത്തിയ വിചിന്തനത്തിലാണ് ഫ്രാൻസീസ് പാപ്പാ ദൈവം മൂന്നു ജ്ഞാനികളിലൂടെ സകല ജനങ്ങൾക്കും വെളിപ്പെടുത്തപ്പെടുന്നതിൻറെ പൊരുൾ വിശകലനം ചെയ്തുകൊണ്ട് ഇപ്രകാരം പറഞ്ഞത്.

ആ ശിശുവിൻറെ ചെറുതും നിഷ്കളങ്കവുമായ നയനങ്ങളിൽ ഈ ജ്ഞാനികൾ  പ്രപഞ്ചസ്രഷ്ടാവിൻറെ വെളിച്ചം കണ്ടുവെന്ന് അനുസ്മരിച്ച പാപ്പാ ആ ശിശുവിനെ നോക്കി അവൻറെ ആ ലാളിത്യത്തിൽ നമ്മളും വിസ്മയംകൊള്ളണമെന്ന് ഓർമ്മിപ്പിച്ചു. യേശുവിനെ ധ്യാനിക്കുക, അവിടത്തെ മുന്നിൽ നില്ക്കുക, ദിവ്യകാരുണ്യത്തിൽ അവിടത്തെ ആരാധിക്കുകയെന്നാൽ സമയം പാഴാക്കലല്ല, പ്രത്യുത, സമയത്തിന് അർത്ഥമേകലാണ് എന്ന് പാപ്പാ ഉദ്ബോധിപ്പിച്ചു. ഹൃദയത്തിന് പോഷണമേകുന്ന ഒരു നിശബ്ദതയുടെ ലാളിത്യത്തിൽ ജീവിതത്തിൻറെ പാത വീണ്ടും കണ്ടെത്തലാണ് അതെന്നും പാപ്പാ വിശദീകരിച്ചു.

കുഞ്ഞുങ്ങളുടെ തനതായ വിശ്വാസത്തോടും, അവരുടെ ക്ഷിപ്ര സന്നദ്ധതയോടും, വിസ്മയത്തോടും, ഭാവാത്മക ആകാംക്ഷയോടും, സ്വാഭവികമായി കരയാനും ചിരിക്കാനും സ്വപ്നംകാണാനുമുള്ള കഴിവോടുംകൂടി അവരെ നോക്കാനുള്ള സമയം നാം കണ്ടെത്തേണ്ടതിൻറെ ആവശ്യകത പാപ്പാ ചൂണ്ടിക്കാട്ടി. മാംസം ധരിച്ച യേശു, കണ്ണുനീരും പുഞ്ചിരിയും കലർന്ന ജീവിതത്തിൻറെ രഹസ്യം നമ്മളുമായി പങ്കിടാൻ ഇഷ്ടപ്പെടുന്നുവെന്നും  അതുകൊണ്ടുതന്നെ നമ്മൾ കുഞ്ഞുങ്ങളുമായി സംസാരിക്കാനും കളിക്കാനും ചിരിക്കാനും സമയം നീക്കിവയ്ക്കണമെന്നും പാപ്പാ ഓർമ്മിപ്പിച്ചു.

ഈ ദിവസങ്ങളിൽ നാം പുൽക്കൂടിനു മുന്നിൽ നിൽക്കുകയും പ്രാർത്ഥിച്ചുകൊണ്ട് യേശുവിന് നിശബ്ദതയിൽ കുറച്ച് ഇടം നൽകുകയും ചെയ്തുവോ? കുട്ടികളുമായി സംസാരിക്കാനും അവരുമൊത്തു കളിക്കാനും സമയം നീക്കിവച്ചോ? ലോകത്തിലെ പ്രശ്നങ്ങൾ  കുഞ്ഞുങ്ങളുടെ നയനങ്ങളിലൂടെ കാണാൻ നമുക്ക് കഴിയുന്നുണ്ടോ? ഇത്യാദി ചോദ്യങ്ങൾ സ്വയം ചോദിക്കാൻ എല്ലാവരെയും ക്ഷണിച്ച പാപ്പാ, ഉണ്ണിയയേശുവിനോടും എല്ലാ കുട്ടികളോടും, പ്രത്യേകിച്ച് യുദ്ധങ്ങളാലും അനീതികളാലും പരീക്ഷിക്കപ്പെടുന്നവരോടുള്ള സ്നേഹം നമ്മിൽ വർദ്ധമാനമാക്കുന്നതിനായി ദൈവമാതാവായ പരിശുദ്ധ മറിയത്തോടു പ്രാർത്ഥിച്ചു.