പത്രോസിൻറെ താക്കോലുകൾ ദ്യോതിപ്പിക്കുന്നത് ആകമാനസഭയെ സേവിക്കാനുള്ള ശുശ്രൂഷാധികാരത്തെ, പാപ്പാ!

ജോയി കരിവേലി, വത്തിക്കാൻ സിറ്റി

സ്വർഗ്ഗരാജ്യത്തിൽ പ്രവേശിക്കുന്നതിന് യന്ത്രസംവിധാനങ്ങളൊ സുരക്ഷാപൂട്ടുകളൊ പ്രവർത്തിപ്പിക്കേണ്ട ആവശ്യമില്ല, പ്രത്യുത, ക്ഷമ, പരിഗണന, സ്ഥൈര്യം, എളിമ എന്നീ പുണ്യങ്ങൾ വളർത്തിയെടുക്കുകയാണ് വേണ്ടതെന്ന് മാർപ്പാപ്പാ.

റോം നഗരത്തിൻറെ സ്വർഗ്ഗീയസംരക്ഷകരായ വിശുദ്ധരായ പത്രോസ് പൗലോസ് ശ്ലീഹാന്മാരുടെ തിരുന്നാൾ ദിനത്തിൽ, ജൂൺ 29-ന് ശനിയാഴ്‌ച, വത്തിക്കാനിൽ നയിച്ച മദ്ധ്യാഹ്നപ്രാർത്ഥനയ്ക്കു മുമ്പു നടത്തിയ വിചിന്തനത്തിലാണ് ഫ്രാൻസീസ് പാപ്പാ, താക്കോലുകളേന്തിയ പത്രോസിൻറെ രൂപത്തെക്കുറിച്ച് പരാമർശിച്ചുകൊണ്ട് ഇപ്രകാരം ഉദ്ബോധിപ്പിച്ചത്.

സ്വർഗ്ഗരാജ്യത്തിൻറെ താക്കോലുകൾ നല്കുമെന്ന് യേശു പത്രോസിനോടു പറഞ്ഞതിനെക്കുറിച്ചു സൂചിപ്പിച്ചുകൊണ്ട് ഈ തോക്കോലുകൾ, ആകമാനസഭയുടെ സേവനത്തനായി യേശു പ്രദാനം ചെയ്ത ശുശ്രൂഷാധികാരത്തെയാണ് പ്രതിനിധാനം ചെയ്യുന്നതെന്ന് പാപ്പാ വിശദീകരിച്ചു.

സുരക്ഷാപെട്ടിയൊ അതിസുരക്ഷാസംവിധാനമുള്ള മുറിയൊ പോലുള്ള ഒന്നല്ല യേശു പരാമർശിച്ച സ്വർഗ്ഗരാജ്യമെന്നും, മറിച്ച്, അത്, ചെറിയ വിത്തിനോടും അമൂല്യമായ പവിഴത്തോടും, മറഞ്ഞുകിടക്കുന്ന നിധിയോടും പുളിമാവിനോടും സദൃശമാണെന്നും പാപ്പാ പറഞ്ഞു. അത് അനർഘവും ചെറുതും സമ്പന്നവും അതേസമയം ബഹ്യമോടികളില്ലാത്തുമാണെന്ന് പാപ്പാ കൂട്ടിച്ചേർത്തു.

യേശു പത്രോസിനെ ഭരമേല്പിച്ച ദൗത്യം കുറച്ചുപേർക്കു മാത്രം പ്രവേശനം അനുവദിച്ചുകൊണ്ട് ഭവനത്തിൻറെ വാതിൽ അടച്ചുപുട്ടുകയല്ല പ്രത്യുത, യേശുവിൻറെ സുവിശേഷത്തോടുള്ള വിശ്വസ്തതയിൽ അതിൽ പ്രവേശിക്കുന്നതിനുള്ള വഴി കണ്ടെത്താൻ സകലരെയും സഹായിക്കുകയാണ് എന്നും നിണസാക്ഷിത്വം വരെ ജീവിതം മുഴവൻ പത്രോസ് അത് വിശ്വസ്തതയോടെ നിറവേറ്റിയെന്നും പാപ്പാ പറഞ്ഞു.  പത്രോസിന് താക്കോൽ ലഭിച്ചത് അദ്ദേഹം പരിപൂർണ്ണനായതുകൊണ്ടല്ല പ്രത്യുത, വിനയമുള്ളവനും സത്യസന്ധനും ആയിരുന്നതുകൊണ്ടാണെന്നും പാപ്പാ കൂട്ടിച്ചേർത്തു.