ദൈവം നമ്മെ വിശുദ്ധിയിലേക്ക് വിളിക്കുന്നു: ഫ്രാൻസിസ് പാപ്പാ

മോൺസിഞ്ഞോർ ജോജി വടകര, വത്തിക്കാന്‍ ന്യൂസ്

ദൈവം നമ്മിൽ വിശുദ്ധിയുടെ വിത്ത് പാകിയിട്ടുണ്ടെന്നും, എന്നാൽ വിശുദ്ധമായ ജീവിതം നയിക്കാനുള്ള ദൈവത്തിന്റെ ക്ഷണത്തിന് സ്വാതന്ത്രമായി ഉത്തരം നൽകാനുള്ള അവകാശം അവൻ നമുക്ക് നൽകിയിട്ടുണ്ടെന്നും ഫ്രാൻസിസ് പാപ്പാ. സകലവിശുദ്ധരുടെയും തിരുനാൾ ദിനമായ നവംബർ ഒന്ന് വെള്ളിയാഴ്ച മദ്ധ്യാഹ്നത്തിൽ വത്തിക്കാനിൽ ത്രികാലജപപ്രാർത്ഥന നയിച്ച അവസരത്തിലാണ് സുവിശേഷഭാഗ്യങ്ങളും, ക്രിസ്തുവിന്റെ ജീവിതമാതൃകയും അനുസരിച്ച് ജീവിക്കാൻ ക്രൈസ്തവർക്കുള്ള വിളിയെക്കുറിച്ച് ഫ്രാൻസിസ് പാപ്പാ ഓർമ്മിപ്പിച്ചത്.

സകലവിശുദ്ധരുടെയും തിരുനാൾ ദിനമായ ഇന്ന്, ക്രൈസ്തവരുടെ തിരിച്ചറിയൽ രേഖയും, വിശുദ്ധിയിലേക്കുള്ള മാർഗ്ഗവുമായ സുവിശേഷഭാഗ്യങ്ങളാണ് യേശു നമ്മോട് അരുളിച്ചെയ്യുന്നതെന്ന്, നവംബർ ഒന്നാം തീയതിയിലെ സുവിശേഷഭാഗത്തെക്കുറിച്ച് (മത്തായി 5,1-12) പരാമർശിച്ചുകൊണ്ട് പാപ്പാ പറഞ്ഞു. ക്രിസ്‌തുതന്നെ ജീവിച്ച സ്നേഹത്തിന്റെ മാർഗ്ഗമാണ് അവൻ നമുക്ക് കാണിച്ചുതരുന്നത്. ഈ മാർഗ്ഗം ഒരു ദാനമാണെന്നും, വിശുദ്ധിയിലേക്കുള്ള ദൈവത്തിന്റെ ക്ഷണത്തിന് സ്വാതന്ത്ര്യത്തോടെ പ്രത്യുത്തരം നൽകാൻ നമുക്ക് കടമയുണ്ടെന്നും പാപ്പാ ഉദ്‌ബോധിപ്പിച്ചു.

വിശുദ്ധിയിലേക്കുള്ള സ്നേഹത്തിന്റെ മാർഗ്ഗം പോലും ദൈവത്തിന്റെ ഒരു ദാനമാണെന്നും, അതുകൊണ്ടുതന്നെ നമ്മെ വിശുദ്ധരാക്കാനും, നമ്മുടെ ഹൃദയം അവന്റേതുപോലെ ആക്കി മാറ്റാനും നമുക്ക് ദൈവത്തോടുതന്നെ പ്രാർത്ഥിക്കാമെന്നും പാപ്പാ പറഞ്ഞു (ദിലേക്സിത് നോസ് 168). യേശുവിനെപ്പോലെ സ്നേഹിക്കാൻ നമ്മെ തടസ്സപ്പെടുത്തുന്നവ തിന്മകളിൽനിന്ന് അവൻ തന്റെ കൃപയാൽ നമ്മെ മോചിപ്പിക്കുന്നവനാണെന്നും അതുകൊണ്ടുതന്നെ നമ്മുടെ ജീവിതത്തിൽ ദൈവത്തിന് കൂടുതൽ ഇടം കൊടുക്കാൻ നാം പരിശ്രമിക്കണമെന്ന് പാപ്പാ ഓർമ്മിപ്പിച്ചു.

സ്വർഗ്ഗസ്ഥനായ പിതാവ് വിശുദ്ധിയുടെ വിത്ത് നമ്മിൽ വിതച്ചിട്ടുണ്ടെന്നും, എന്നാൽ വിശുദ്ധിയുടേതായ ഒരു ജീവിതം നമ്മിൽ അടിച്ചേൽപ്പിക്കാതെയും അതിനായി നിർബന്ധം ചെലുത്താതെയും, എന്നാൽ വിശുദ്ധിയിലേക്കുള്ള ആ വിളിക്ക് നമ്മുടെ സ്വതന്ത്രമായ മറുപടിക്കായി കാത്തുനിൽക്കുകയുമാണെന്ന് പാപ്പാ ഉദ്‌ബോധിപ്പിച്ചു. ദൈവം നമ്മുടെ മുന്നിൽ വയ്ക്കുന്ന പദ്ധതികളും, ഉൾപ്രേരണകളും അനുസരിച്ച് ജീവിക്കാനുള്ള സ്വാതന്ത്ര്യം നമുക്ക് അവൻ നൽകുന്നുണ്ട് (ദിലേക്സിത് നോസ് 179). അവൻ നമുക്ക് കാണിച്ചുതരുന്നതുപോലെ, മറ്റുള്ളവർക്കായുള്ള ശുശ്രൂഷയിലും, ലോകം മുഴുവനിലേക്കുമെത്തുന്ന വലിയ സ്നേഹത്തിന്റെ മനോഭാവത്തിലും ജീവിക്കാനുള്ള തീരുമാനം നമ്മുടേതാണെന്ന് പാപ്പാ കൂട്ടിച്ചേർത്തു.

ഈയൊരു ജീവിതത്തിന്റെ മാതൃക നമ്മുടെ സമകാലീനരായിരുന്ന വിശുദ്ധരിലും നമുക്ക് കാണാൻ സാധിക്കുമെന്ന് പറഞ്ഞ പാപ്പാ, ഔഷ്വിത്സിൽ, മരണത്തിന് വിധിക്കപ്പെട്ട ഒരു കുടുംബനാഥന് പകരം തന്റെ ജീവൻ നൽകിയ വിശുദ്ധ മാക്സമില്യൻ കോൾബെയുടെയും, പാവപ്പെട്ടവർക്കായി തന്റെ ജീവിതം മുഴുവൻ നീക്കിവച്ച വിശുദ്ധ മദർ തെരേസയുടെയും, പാവപ്പെട്ടവരുടെ അവകാശങ്ങൾ കാക്കാനായി പരിശ്രമിച്ചതിന്റെ പേരിൽ അൾത്താരയിൽ കൊലചെയ്യപ്പെട്ട വിശുദ്ധ ബിഷപ് ഓസ്കാർ റൊമേറോയുടെയും ഉദാഹരണങ്ങൾ മുന്നോട്ടുവച്ചു. അനുദിനം, സുവിശേഷഭാഗ്യങ്ങളാൽ രൂപപ്പെട്ടവരായി ദാരിദ്ര്യത്തിലും, എളിമയിലും, കരുണയിലും, നീതിക്കായുള്ള ദാഹത്തിലും, സമാധാനത്തിനായുള്ള പ്രവൃത്തികളിലും  ജീവിക്കാൻ പരിശ്രമിച്ചവരാണ് അവരെന്ന് പാപ്പാ ഓർമ്മിപ്പിച്ചു.

വിശുദ്ധമായ ഒരു ജീവിതമെന്ന ദാനത്തിനായി നാം ദൈവത്തോട് പ്രാർത്ഥിക്കുന്നുണ്ടോയെന്ന് സ്വയം ചോദിക്കാമെന്ന് പാപ്പാ ആഹ്വാനം ചെയ്തു. പരിശുദ്ധാത്മാവ് നമ്മിൽ നൽകുന്ന പ്രേരണകൾക്ക് അനുസൃതമായി ജീവിക്കാനും, നാമായിരിക്കുന്ന ഇടങ്ങളിൽ സുവിശേഷഭാഗ്യങ്ങൾ പ്രാവർത്തികമാക്കാനും നമുക്ക് സാധിക്കുന്നുണ്ടോയെന്നും പാപ്പാ ചോദിച്ചു. എല്ലാ വിശുദ്ധരുടെയും റാണിയായ പരിശുദ്ധ അമ്മ നമ്മുടെ ജീവിതത്തെ വിശുദ്ധിയുടെ മാർഗ്ഗമായി മാറ്റാൻ സഹായിക്കട്ടെയെന്ന് പാപ്പാ ആശംസിച്ചു.