Papa: të përballohet sfida e takimit të Ungjillit me Kushtetutën
R.SH. / Vatikan
Ukraina, Palestina, Izraeli, Sudani, Mianmari, por edhe çdo popull që vuan nga lufta ishin në qendër të lutjes së Engjëllit të Zotit, të cilën Papa sot e kremto, në mesditë, në Trieste. Duke siguruar lutjet e tij për të burgosurit, të sëmurët dhe emigrantët, e quajti Triesten "derë e hapur për migrantët" me "vokacionin e bashkimit të njerëzve të ndryshëm", “port i rëndësishëm në udhëkryqin midis Italisë, Evropës Qendrore dhe Ballkanit.
Falënderim, të gjithëve!
Të dashur vëllezër dhe motra – theksoi Papa në fillim të lutjes së Engjëllit të Zotit - para bekimit të fundit, dua t'ju përshëndes të gjithëve, të mbledhur në këtë shesh shumë tërheqës. Falenderoj Ipeshkvin për fjalët e tij dhe mbi të gjitha për përgatitjen e vizitës e edhe ata, që bashkëpunuan në shumë mënyra, veçanërisht për liturgjinë dhe për shërbesat e ndryshme; si dhe shumë njerëz, që morën pjesë me lutje. I siguroj afërsinë time të sëmurëve, të burgosurve, emigrantëve, të gjithë atyre, që luftojnë më shumë.
Trieste, udhëkryq i Italisë
Trieste është një nga ato qytete që ka thirrjen për të bashkuar njerëz të ndryshëm: në radhë të parë sepse është port, e një port i rëndësishëm, e më pas, sepse ndodhet në udhëkryq ndërmjet Italisë, Evropës Qendrore dhe Ballkanit. Në këto situata, sfida për bashkësitë kishtare dhe civile është të dinë të kombinojnë hapjen dhe stabilitetin, mirëpritjen dhe identitetin. E kështu dëshiroj të them:
“…ju e keni atë, që duhet për të përballuar këtë sfidë! Si të krishterë, ne kemi Ungjillin, i cili i jep kuptim dhe shpresë jetës sonë; e si qytetarë keni Kushtetutën, “busull” të besueshme për rrugën drejt demokracisë. Pra, përpara! Pa frikë, i hapur dhe i vendosur në vlerat njerëzore dhe të krishtera, mikpritës, por pa cenuar dinjitetin njerëzor”.
Nga ky qytet ta përtërijmë angazhimin tonë për t'u lutur dhe për të punuar për paqen: për Ukrainën e martirizuar, për Palestinën dhe Izraelin, për Sudanin, Mianmarin dhe çdo popull që vuan nga lufta.
E të kërkojmë ndërmjetësimin e Virgjërës Mari, e nderuar mbi Monte Grisa si Nënë dhe Mbretëreshë.
