தாழ்ச்சி மற்றும் அமைதியின் அரசராக எருசலேம் நுழைந்த இயேசு

மெரினா ராஜ் – வத்திக்கான்

இயேசு தாழ்ச்சியுள்ள மற்றும் அமைதியுள்ள அரசராக, எருசலேமிற்குள் நுழைந்தார் என்றும், இரக்கமுள்ள அவரே நம் பாவங்களை மன்னிக்க வல்லவர், எனவே அவருக்கு நம் இதயங்களைத் திறப்போம் என்றும் கூறினார் திருத்தந்தை பிரான்சிஸ்.

மார்ச் 24 ஞாயிற்றுக்கிழமை வத்திக்கான் தூய பேதுரு பெருங்கோவில் வளாகத்தில் நடைபெற்ற புனித வாரத்தின் துவக்கமான குருத்து ஞாயிறு திருப்பலியின் இறுதியில் வழங்கிய மூவேளை செப உரையின்போது இவ்வாறு கூறினார் திருத்தந்தை பிரான்சிஸ்.

நமது பகைமை, வெறுப்பு, வன்முறை போன்றவற்றிலிருந்து நம்மை விடுவிக்க வல்லவர் இயேசு என்று வலியுறுத்திய திருத்தந்தை பிரான்சிஸ் அவர்கள், கொலம்பியாவில் இறந்தவர்கள், மாஸ்கோ, உக்ரைன், காசா பகுதியில் போரினால் பாதிக்கப்படும் மக்கள் அனைவரையும் நினைவுகூர்ந்து செபித்தார்.

சில நாட்களுக்கு முன்பு கொலம்பியாவில் உள்ள San Josè de Apartado குழுமத்தில் இருந்த ஓர் இளம் பெண்ணும் சிறுவனும் கொலை செய்யப்பட்டதை எடுத்துரைத்து அதற்காக தன் ஆழ்ந்த இரங்கலையும் உடனிருப்பையும் தெரிவித்த திருத்தந்தை அவர்கள், கடந்த 2018- ஆம் ஆண்டு, ஒருங்கிணைந்தப் பொருளாதாரம், அமைதி மற்றும் மனித உரிமைகளுக்கான அர்ப்பணிப்புக்காக அக்குழுமம் விருது பெற்றது என்றும் எடுத்துரைத்தார்.

அண்மையில் மாஸ்கோவில் நடந்த பயங்கரவாதத் தாக்குதலினால் பாதிக்கப்பட்டவர்களுக்காகத் தனது செபத்தினை எடுத்துரைத்த திருத்தந்தை அவர்கள், இறந்தவர்கள் அனைவரையும் இறைவன் அவரது இல்லத்திற்கு அமைதியுடன் வரவேற்கவும், இறந்தவர்களின் குடும்பத்தாருக்கு ஆறுதல் அளிக்கவும் செபிப்போம் என்றும் கூறினார். இத்தகைய கொடிய செயல்கள், மனிதாபிமானமற்ற செயல்கள் அனைத்தும் கொலை செய்யாதே என்று கட்டளைப் பிறப்பித்தக் கடவுளைப் புண்படுத்துகின்றன என்றும், இத்தகைய செயல்களை செய்பவர்களின் இதயங்களை இறைவன் மாற்றட்டும் என்றும் கூறினார் திருத்தந்தை.

உரோம் மற்றும் உலகின் பல்வேறு பகுதிகளிலிருந்து வந்திருந்த திருப்பயணிகள் அனைவரையும் வாழ்த்திய திருத்தந்தை பிரான்சிஸ் அவர்கள், கடந்த ஆண்டைப் போலவே இவ்வாண்டும் குருத்து ஞாயிறு வழிபாட்டிற்காக பனை ஓலைக்குருத்துக்களை வழங்கிய இத்தாலியின் சன்ரேமோ நகர மக்கள் அனைவருக்கும் தன் நன்றியினைத் தெரிவித்தார். நான்கு நூற்றாண்டு அளவாக, பாரம்பரியம் மிக்க இந்த குருத்து ஞாயிறு பவனி வழிபாட்டிற்குத் தொடர்ந்து உதவி வரும் அம்மக்களுக்கு இறைவன் ஆசீர் அளிப்பாராக என்றும் கூறினார் திருத்தந்தை.

போரினால் பாதிக்கப்பட்ட அனைத்து சகோதர சகோதரிகளுக்காகவும் செபிப்போம் என்று கூறிய திருத்தந்தை அவர்கள், துன்புறுத்தப்பட்ட உக்ரைன் மக்களுக்காகவும், வாழ்விடங்கள் தாக்கப்பட்டு மின்சார வசதியின்றி துன்புறும் மக்களுக்காகவும் சிறப்பாக செபிக்கவேண்டும் என்றும் கேட்டுக்கொண்டார்.   

மோதல்களானது மரணம் மற்றும் துன்பத்தை ஏற்படுத்துவதோடு, பெரிய அளவில் மனிதாபிமானப் பேரழிவையும் ஏற்படுத்துகின்றது என்றும், போரினால் துன்புறும் உக்ரைன் மற்றும் காசா பகுதி மக்களுக்காக செபிக்க மறக்க வேண்டாம் என்றும் கூறினார் திருத்தந்தை.

புனித வாரத்தின் இந்நாட்களில் இயேசுவோடு மிக நெருக்கமாக இருக்கவும், உயிர்ப்பின் மகிழ்வை நாம் பெறவும், அன்னை மரியாவிடம் அருள்வேண்டுவோம் என்று கூறி மூவேளை செபத்தைத் தொடர்ந்து தனது சிறப்பு ஆசீரை வழங்கினார் திருத்தந்தை பிரான்சிஸ்.