Սիրելու համար պէտք են քիչ խօսքեր եւ գործնական արարքներ. Ֆրանչիսկոս Պապ
Ռոպէր Աթթարեան - Վատիկան
Կիրակի 11 Փետրուար 2024ին Ֆրանչիսկոս Պապը, Սուրբ Պետրոս պազիլիքային մէջ նախագահելէ ետք Արժանթինցի առաջին Սրբուհի Մամա Աթուլայի սրբադասման արարողութիւնը, կէսօրին որ գրասենեակի պատուհանէն արտասանեց Հրեշտակ Տեառն Մարեմեան աղօթքը որուն ընթացքին ներկայացուց նաեւ աւանդական խորհրդածութիւնը մեկնաբանելով օրուան աւետարանական հատուածը որ քաղուած էր Մարկոսի Աւետարանէն (Գլ. 1,40-45) ուր կը պատմուի Յիսուսին կողմէ բորոտին բժշկութեան դրուագը։
«Հիւանդին աղաչանքին Յիսուս կը պատասխանէ «Կ՛ուզեմ մաքրուէ» (41) , եւ «բորոտութիւնը իսկոյն գնաց վրայէն եւ մարդը մաքրուեցաւ» (42)։
Քիչ խօսքեր եւ գործնական արարքներ
«Ահա տառապողին նկատմամբ Յիսուսին ոճը` քիչ խօսքեր եւ գործնական արարքներ» ըսաւ Քահանայապետը ակնարկելով, թէ Աւետարանին մէջ շատ անգամ կը հանդիպինք Յիսուսին այս վարմունքին, ան «քիչ կը խօսի եւ խօսքերուն կը հետեւեցնէ գործը»... «Ան չի յապաղիր ելոյթներով կամ հարցաքննութիւններով... ցոյց կու տայ նուրբ համեստութիւնն անոր` որ ուշադիր կը լսէ և կը գործէ անմիջապէս, եւ նախընտրաբար առանց ուշադրութիւն գրաւելու»։
«Ասիկա սիրելու սքանչելի ձեւ մըն է ու լաւ պիտի ըլլար զայն երեւակայել եւ իւրացնել» ըսաւ Քահանայապետը հրաւիրելով նաեւ ակնարկ նետել մեր շուրջը կատարուածին երբ կը հանդիպինք այդպիսի վերաբերմունքով անձերու, որոնք սթափ են խօսքերով բայց գործերով վեհանձն, որոնք չեն ցանկար ցուցադրել իրենց զիրենք, այլ պատրաստ են օգտակար դառնալու, արդիւնաւէտ օգնութեան հասնելու մէջ որովհետեւ տրամադիր են ունկնդրութեան։
Սէրը կարիք ունի շօշափելիութեան, ներկայութեան, հանդիպումի
«Այս գործնականութիւնը շատ կարեւոր է մեր այս աշխարհին մէջ ուր կը թուայ թէ միշտ աւելիով ճամբայ կը կտրէ յարաբերութիւններու անհետացող վերացականութիւն մը» ըսաւ ապա Քահանայապետը հրաւիրելով ունկնդրել Աստուծոյ Խօսքը ուր ընդգծուած` թէ «սէրը կարիք ունի շօշափելիութեան, ներկայութեան, հանդիպումի, նուիրուած ժամանակի ու տարածքի, ան չի կրնար վերածուիլ գեղեցիկ բառերու, պաստառի մը վրայ պատկերներու, ակնթարթի մը «սելֆիներու» կամ հապճեպ պատգամներու։ Ասոնք օգտակար գործիքներ են, բայց բաւարար չեն սիրոյ համար, չեն կարող փոխարինել գործնական ներկայութիւնը» ըսաւ Քահանայապետը ու հրաւիրեց հարցաքննելու մենք զմեզ ու հասկնալու թէ ինչ ձեւի վարուելակերպ մը ունինք հուսկ հայցեց Մարիամին հովանին որպէսզի օգնէ մեզէ պատրաստ ու գործնական ըլլալու սիրոյ մէջ։
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
