വിഭജനമതിലിനെ തകർത്ത ജറുസലേം സാഹോദര്യ സമാഗമം!

ജോയി കരിവേലി, വത്തിക്കാൻ സിറ്റി

ക്രൈസ്തവൈക്യത്തിൻറെ പാതയിൽ ഒരുമിച്ച് പ്രാർത്ഥിക്കുകയും ഒരുമിച്ച് ചരിക്കുകയും ഒരുമിച്ച് പ്രവർത്തിക്കുകയും ചെയ്തു കൊണ്ട് നമ്മൾ സഭയിലെ രണ്ടു മഹാത്മാക്കളായ വിശുദ്ധ പോൾ ആറാമൻ, കോൺസ്റ്റൻറിനോപ്പിളിലെ എക്യുമെനിക്കൽ പാത്രിയാർക്കീസായിരുന്ന അത്തെനാഗോറസ് എന്നിവരുടെ ആശ്ലേഷത്തിൽ നിന്ന് പാഠം പഠിക്കണമെന്ന് മാർപ്പാപ്പാ.

1964 ജനുവരി 4-6 വരെ തീയതികളിൽ ജറുസലേമിൽ ഇടയസന്ദർശനം നടത്തിയ വിശുദ്ധ പോൾ ആറാമൻ പാപ്പാ തദ്ദവസരത്തിൽ ജറുസലേമിൽ വച്ച് കോൺസ്റ്റൻറിനോപ്പിളിലെ എക്യുമെനിക്കൽ പാത്രിയാർക്കീസായിരുന്ന അത്തെനാഗോറസുമായി നടത്തിയ കൂടിക്കാഴ്ചയുടെ അറുപതാം വാർഷികം അനുസ്മരിച്ചുകൊണ്ടാണ് ഫ്രാൻസീസ് പാപ്പാ ഇതു പറഞ്ഞത്. പ്രത്യക്ഷീകരണത്തിരുന്നാൾ ദിനമായിരുന്ന ശനിയാഴ്ച (06/01/24) വത്തിക്കാനിൽ നയിച്ച മദ്ധ്യാഹ്നപ്രാർത്ഥനാ വേളയിൽ ആശീർവ്വാദാനന്തരം ജനങ്ങളെ അഭിവാദ്യം ചെയ്യുകയായിരുന്നു പാപ്പാ.

നൂറ്റാണ്ടുകളായി കത്തോലിക്കരെയും ഓർത്തഡോക്‌സുകാരെയും അകറ്റി നിർത്തിയിരുന്ന വിഭജന മതിലിനെ തകർത്ത ഒന്നായിരുന്നു വിശുദ്ധ പോൾ ആറാമനും എക്യുമെനിക്കൽ പാത്രിയാർക്കീസ് അത്തെനാഗോറസും തമ്മിൽ നടത്തിയ ആ കൂടിക്കാഴ്ചയെന്ന് പാപ്പാ പറഞ്ഞു.ജറുസലേമിൽ സംഭവിച്ച സാഹോദര്യത്തിൻറെ ചരിത്രപരമായ ആ പ്രവർത്തിയെക്കുറിച്ച് ചിന്തിച്ചുകൊണ്ട്, മദ്ധ്യപൂർവദേശത്ത്, പലസ്തീനിൽ, ഇസ്രായേലിൽ, ഉക്രൈയിനിൽ, ലോകമെമ്പാടും സമാധാനം സംസ്ഥാപിക്കപ്പെടുന്നതിനായി പ്രാർത്ഥിക്കാൻ പാപ്പാ എല്ലാവരെയും ക്ഷണിച്ചു. ഇറാനിയൻ ജനതയോടും, പ്രത്യേകിച്ച് കെർമാനിൽ നടന്ന ഭീകരാക്രമണത്തിൽ കൊല്ലപ്പെട്ട നിരവധി പേരുടെ കുടുംബാംഗങ്ങളോടും, പരിക്കേറ്റവരോടും, ഈ ദുരന്തത്തിൻറെ വലിയ വേദന അനുഭവിക്കുന്നവരോടും പാപ്പാ തൻറെ സാമീപ്യം അറിയിക്കുകയും ചെയ്തു.