Papa: nuk është e lehtë të ndjekësh Jezusin, por vetëm Ai ka fjalë të Jetës së Amshuar

R.SH. / Vatikan

“Nuk është e lehtë të ndjekësh Jezusin, të kuptosh mënyrën e tij të veprimit, t'i bëjmë tonat kriteret e tij dhe shembujt e tij” megjithatë Pjetri dhe apostujt e tjerë e gjetën vetëm tek Ai përgjigjen e etjes për jetën, për gëzimin, për dashurinë që i gjallëron,“prandaj nuk largohen nga Jezusi”. Kështu tha Papa Françesku në reflektimin e tij përpara lutjes së Engjëllit të Zotit të drejtuar nga dritarja e Pallatit Apostolik në Sheshin e Shën Pjetrit, sot në mesditë.

Papa Françesku gjatë kremtimit të lutjes mariane të Engjëllit të Zotit, kremtuar sot në mesditë në Sheshin e Shën Pjetrit,  komentoi Ungjillit të së kësaj së diele të 21-të gjatë vitit kushtar nga Gjoni (Gjn 6,60-69) dhe kujtoi përgjigjen e famshme që i dha Shën Pjetri Jezusit: “Zot, te kush të shkojmë? Ti ke fjalët e jetës së pasosur” (Gjn 6,68). Shprehje tejet e bukur, kjo - kujtoi Papa - që flet vetë për miqësinë dhe besimin që e lidh Pjetrin me Krishtin, njëherësh me dishepujt e tjerë:

“Pjetri e shqiptoi në një çast kritik. Jezusi sapo përfundoi një fjalim të vështirë, në të cilin pohoi se ishte ‘buka që zbriti nga qielli’ (shih Gjn 6,41):  gjuhë e vështirë kjo, për t'u kuptuar nga njerëzit, e shumë prej tyre, madje edhe dishepuj, e braktisën”.

Të Dymbëdhjetët e kuptuan, ndaj mbetën

Të Dymbëdhjetët, megjithatë, nuk e bënë këtë -  sqaroi Papa - mbetën. E  morën këtë vendim aspak të lehtë, sepse tek Ai gjetën "fjalë të jetës së amshuar". E dëgjuan kur predikonte, panë mrekullitë që kreu dhe vazhduan të ndajnë me të çastet publike dhe intimitetin e jetës së përditshme (shih Mc 3,7-19):

“Ata nuk e kuptojnë gjithnjë çka thotë dhe çka bën Mësuesi; ndonjëherë përpiqen t’i pranojnë paradokset e dashurisë së tij (shih Mt 5,38-48), kërkesat ekstreme të mëshirës së tij (shih Mt 18,21-22), radikalitetin e mënyrës së tij për t'iu dhuruar të gjithëve”.

Nuk është e lehtë ta ndjekësh Krishtin

 Po sjellja e Jezusit shpesh shkon përtej mendësisë së përbashkët, përtej vetë kanuneve të fesë dhe traditave institucionale, deri në pikën e krijimit të situatave provokuese dhe të padëshirueshme (shih Mt 15,12). Nuk është e lehtë ta ndjekësh.

Megjithatë, ndërmjet shumë mësuesve të asaj kohe, Pjetri dhe apostujt e tjerë e gjetën vetëm tek Ai përgjigjen e etjes për jetën, për gëzimin, për dashurinë që i gjallëron; vetëm falë Tij përjetuan plotësinë e jetës që kërkonin, përtej kufijve të mëkatit e madje edhe të vdekjes:

“Prandaj nuk largohen: në të vërtetë të gjithë, përveçse njërit i cili, pavarësisht nga shumë rënie dhe pendime, do të qëndronte me Të deri në fund të fundit (shih Gjoni 17,12).

A është e lehtë ta ndjekim Zotin?

Fjalët e shqiptuara më lart nga Papa, na shqetësojnë edhe neve: edhe ne nuk e kemi të lehtë ta ndjekim Zotin, të kuptojmë mënyrën e tij të veprimit, t'i bëjmë tonat kriteret e tij dhe shembujt e tij. Por…

“…megjithatë, sa më shumë t'i qëndrojmë pranë - sa më shumë t'i përmbahemi Ungjillit të tij, të marrim hirin e tij në Sakramentet, të qëndrojmë në shoqërinë e tij në lutje, ta imitojmë atë në përulësi dhe dashuri - aq më shumë e jetojmë bukurinë që lind nga miqësia me Të. Atëhere e kuptojmë se vetëm Ai ka "fjalë të jetës së amshuar".

Pra, ne e pyesim veten: sa është Jezusi i pranishëm në jetën time? Sa e lë veten të prekem dhe të provokohem nga fjalët e tij? A mund të them se janë “fjalë jete” edhe për mua?

“Maria, e cila e mirëpriti Jezusin, Fjalën e Hyjit, në korpin e saj, na ndihmoftë ta dëgjojmë dhe të mos e braktisim kurrë”.